جنح من غفلة , وجنح من الظما واقبلت طاير =يم نجمٍ"ن" لي غمز بالحلم وبحلمي هوى
مثل "بن فرناس" قلبي كان في الاحلام سادر =وطاح في وادي الغضا ويظن نفسه في طوى
ياحبيبي في رواية حب مسرحها الدفاتر =وياخصيم العزه اللي ما حقنت دم الهوى
طار عطرك قبل ترحل,وسط دخان السجاير =مابقي الا اعقابها وقروح فالصدر وجوى
ما بقي الا التبغ يروي قصتك يا حظ جاير =وانتهى عمره وعمر الحب بأنفاسك سوى
بين احضانك رميت العمر والاحساس خاير =قلت جا قلبي دخيل ,وقلت لي مالك لوى
وتهت باحلامي ولافكرت وين وليش ساير =قلت صاح الحب في فجري وهو ذيب"ن" عوى
ومن ورا ظهري السجاره تاكل اطراف الضفاير =كيف من ضمة يدينك بان زيف المحتوى؟!
ثغرة"ن" في الثوب وأخرى نافذه لاقصى الضماير =السجاره جايعه .........والعشب بالنار ارتوى
كانت أنفاسك مخدر,كان دخانك ستاير =لين شقت غفلتي صرخة ألم قلب انكوى
صرخة"ن" صحت نجوم الحرف في ليل المحابر =يوم رددها الصدى في صخر قلبك وانطوى
بك قدحت الواقع اللي زاد بك حجم الخساير =ياشراره اشعلت نارٍ بها شعري ضوى
يا اول الخيبات وآخر طب لجروح المشاعر =ما يداوي الكي.. كي إن قيل من داها دوا
إإإإإإيه يا رحله على مركب ورق والموج هادر =يركب الاحلام قلبٍ ن مدّ عنقه وانلوى
لليمين ولليسار وفوق سطح الموج داير =لجة"ن" من بعدها قلبي على الجودي استوى