يا زين لا تعرقل طريق المسافر = عابر سبيل ولا له بداركم شف
يا بو عيونٍ يطعنن بالخناجر = من رمشهن سهم الهوا بالحشى رف
ارحم قتيل الناعسات السواحر = وزميّمٍ فوق الاشافي مشرّف
يا مهرةٍ من نقوة الخيل ضامر = غراء بمنقوش المكثّل تغريف
صما العظام المبهمة بالحوافر = في هيكلٍ عن مطلب الوزن ما خف
والردف طعسين اليتيمة تخازر = عقب السحاب اللي عليهن ترادف
يطون جديد اللبس طي الجباير = شوامخٍ بمعلّق الورك وقف
مربوعة القامة هضيم الخواصر = مصبوبة الجسم اللطيف المسرجف
كن النهود البارزات الظواهر = رماّنتين العتش والوبل ما كف
ومنقّضٍ كنه لهيب السعاير = عطر فرنسا في مثانيه ما جف
مثل الذهب دونه كونتر وتاجر = على حريرٍ باليدين يتعطّف
وسودٍ غواضي فيهن الكحل حاير = هدبٍ مذانبهن تدف الهوا دف
من حقها لو حيّرت كل ساير = براّقة الذرعان مدفونة الكف
كفٍ كما الصافي من القطن فاخر = عليه ترفات الاصابع مرعّف
مخضّباتٍ بالخواتم حواسر = يزهاهن الفن البديع المزخرف
بنت الرجال الطيبين الاكابر = عوارفٍ لا جاهم العلم ياقف
أهل الكرم والجود ماضي وحاضر = مجدٍ مثبّت بالأدلّة معرّف
مروين عطشانٍ به الدم خاثر = مصقول فولاذٍ يسف الحمر سف
من فوق دهمٍ باتعاتٍ صواطر = حجلٍ تحت ضل الاسنّة معسّف
الواردات الصادرات الكواسر = من طاح قدم نحورهن بالوغى هف