يا هجوسي عانقي غر السحاب = والمعاني كنّها وبل الغشينــــــــــي
الجليد اللي نشأ فوق الهضاب = لين غطاها وصارت ما تبينــــــــي
بعد ما اشتدت عليه الشمس ذاب = واضحه معالـــمه قـــدام عينــــي
والطريق اللي يؤدي للنشاب = من جهلنا نسلــــكه طـــول السنينـــي
عزتي للي رضا طرد السراب =والضماء فالجوف يا الاجواد شينــي
فوق ستين انتهت يا اهل الحساب = ومن يقودون السفينه حايرينـــــي
لو نعاتب ما يفيد لنا العتاب =عقبنــــــا بد انقســـمنا بدتــينــــــــــــــي
صار يدخل بيننا الناس الغراب = والغريب اللي بدا يرطن رطينـــــي
كيف صار الداب في بطن الجراب = انبلشنا بالجراب وبالقرينــــــــي
يوم قلنا ما اكتمل فيها النصاب = دوروها بالشمـــــال وباليمينـــــــــي
يا الله انك تحفظ اللي ما يهاب = له مواقيـــــف الرجال الغانمينـــــــي
رجل يظهر في المواقيف الصعاب = الحريص اللي يلم المسلمينـــــي
خاب من يلحق على النّار الشهاب = ما يبي من بين الإخوة علم زيني
واضح المقصود في من جاء وغاب =ما جهله إلا الذي ما هو فطيني
والفطين يعرف مضمون الكتاب = فيه من يبا الرحى تطحن طحيني
يا أبو متعب كل ما قلته صواب = يا الله إن تعمي عيون الحاسدينــي
بان قول العقل في نص الخطاب = وانعرف غث الكلام من الثميني
انغلق باب التجني والسباب = وانفتح باب العفـــو بالصرعتيـــنــي
من يبا العزة تراه الفال طاب = والعدو معروف للي فاهمينــــــــي