لاتعاملون أبنائكم بالعُنف والقلب الغليظ
الطّفل يرغب أن يجد في بيئته محميّته
وطبعاً يُريد أنّه يرى مشاعرك يمُّه تهيض
يعني تسرّه جيتك وتفرّحه في جيّته
ولا تنزع من الطّفل رغبه تجعل ادموعه تفيض
هذي تراها مثّره على بنا شخصيّته
ولا يرتفع صوتك عليه ويشحب الوجه الوميض
هذا يسبّب له حرج فالصّدر تبقى كيّته
ودعواتكم لولادكم يبقون في حفظ الحفيظ
واللَّهُ خَيْرٌ حَافِظًا وأحيوا مشاعر ميّته
ولاتجعلون مقارنه هذا طويل وذا عريض
كُلّاً عطاه الله قسمه وادمحوا له سيّته
ولاتزرعون الغِلّ فيهم سيء المنهج بغيض
كُلّاً يُحاسب بالعمل اللي صدر من نيّته
أبدوا لهم تشجيعكم حتّى لو الواقع يغيض
تحطيمكم لبنائكم ترى المهالك ديّته
ولو تزرعوا فيهم ثقه بيصعدون من الحضيض
بَسّ احتووا أبنائكم والشّر تُقتل حيّته
ياشجرة الأُسرة ياليته مايجي شوكك مضيض
ابنك رغب يجلس تحت ظِلّك ويهنى فيّته
هذا ترى منهج حياة ينوّر اللي له نقيض
طِفلك تراه بذُمّتك في موق عينك بيّته

الشّاعر/ خالد بن عبيد بن معتوق الأحمدي