لاواهني الطير في سماه=الارض ارضه والسما سماه
ان حط فوق الغصن ملك اجداده=والى نوى المطير في هواه
ماقدمه حدود ترد رحاله=ولاله ولي أمرٌ سوى مولاه
والرزق متكفل به اللي جابه=من حيث مايمسي لقا عشاه
تضرب به الامثال فالتوكل=وهذي أحد ركائز الغناه
واعلى مكانه للبشر يبلغها=واعظم جزى بالاخرة يلقاه
أجر الشهيد اللي يقدم روحه=ثمن لجنة ربي ورضاه
روحه تعلق في حواصل طائر=بالعرش ماتحسب له الوفاه
الطير لو هو كائن مستحقر=الله .. بأعظم نعمةٍ حباه
يقضي نهاره في حلاوة يومه=ويرقد على التسبيح والصلاه
ولاشق نور الفجر قام يغرد=يومه بتسبيح الكريم ابداه
ماله هموم ولا يشيل أمانه=وابليس خلفه مايحث اخطاه
ياليتني مثله وامد اجناحي=وامد شوفي واسبح بفضاه
هذي مناوي والمناوي واجد=ولاكل رجال يجيب مناه
لو المناوي حيلة المتعاجز=يلقا بها عن ما عجز مسلاه
والمؤمن الكيّس فطين وحاذق=ويعمل ليومٍ كلنا عراه
وصلى الله وسلم على رسوله=ازكى صلاة للنبي مهداه
اعداد ماصلى عليه مصلي=واعداد ماينسى نبيّه لاه