يقول من زيـن المثايـل طـراً لـه=واشرف علـى راس العبيـل وتمثـل
من هاجسٍ يـوم انهـن هايفـن لـه=والعصر من قصر الشرف هايف الظل
لساقهـن مـن دافعـن ساوقـن لـه=ويفهم لهـن بيبـان مطلـع ومدخـل
الله مـن قـلـبٍ هجـوسـه تمـلـه=والكبد من كثر العجـز علهـا عـل
كثـر النفـاق مـن المقاريـد علـه=وعدواه بين الناس عدوى مرض سـل
زبنـي كفيـل الخلـق دقـه وجلـه=وعن منـة الأنـذال مـدالله افضـل
برزان يغني عن بعض نـاس ظلـه=والخالق الرازق يغنـي عـن الكـل
لا حظت من بعض الصداقـه مملـه=وراع اللقـا مايهيـن نفسـه ليامـل
اهانـة النفـس العـزيـزه مـذلـه=لاعاش من يرضى على نفسـه الـذل
راع العزيـزه عـز نفسـه جبـلـه=وعن كثرة الخلان خـلٍ بـدل خـل
خـلٍ ليـا منـك عرفـتـه تمـلـه=وخـلٍ يعوضـك بالبعيديـن والمـل
الله ولا خــلٍ خيـالـي بـخـلـه=لا قيـل خايـل فـي خليلـه تخايـل
وليـا طلـب لـه مطلـبٍ ماحصلـه=ماكـن خلـه فيـه مــره تجـمـل
حبـل الصداقـة لـو فتلتـه يفـلـه=اليـا زعـل لـه مـرةٍ فلهـا فــل
وراح الغلا والبغـض حـل بمحلـه=واللـي مـن اول يالحويفـي تحـول
اسنـدت لـك بالـراي يامسنـدٍ لـه=يابدر بن عواد قـل لـي وش الحـل
يوم انـت موضـوع الرفاقـه تحلـه=ورجلٍ مجـرب والتجـارب لهـا دل
للتجربـه برهـان مـنـه الادلــه=وبعض الاطباء منه الاعصاب تنشـل
ليا جاك من بعـض المقاريـد زلـه=وشلـون يابـدر الحويفـي تحـمـل
يمكـن تقـول ان مـا تبلـواك خلـه=لكـن عـروق احلوقنـا تلهـا تــل
بالكذب والغـرات رحنـا عشـاً لـه=بـرّق يابوسلمـان فـيـه وتمـهـل
لاصار خبـلٍ عـي كيـف احتملـه=امـا نطحتـه بالعيـا قـال لـك ذل
الا ولا ادري لـو ورا الهـرج شلـه=واللي هـرج بالهـرج منهـم تنفـل
يشوف عنـده باكثـر النـاس خلـه=وعن عيبه اللي فيـه تقـل ايتجيهـل
وشوّه طريـق الديـن مـن يستغلـه=لو هو حرامـي قلـب حـرم وحلـل
عزي لمن شـذب المقفـي جـداً لـه=هرج القفا ماقيل يبـرد لاحـد غـل
ياويل مـن هـرج القفـا مهنـةٍ لـه=قتـات والقتـات بالـدرك الاسـفـل
والهـرج ماهـو هـم كثيـره وقلـه=مـار البـلا المحتـال ليـه ايتحيـل
والله ماجامـل لـلـردي وامتثـلـه=لـو الـردي يشـره عليّـه ويزعـل
والطّيـب ادمـح زلتـه شيمـةٍ لـه=ولا اشفق على زلـة رفيقـي ليـازل
اصبـر واجامـل كلهـا حشمـةٍ لـه=لاشـك زلات الـردي مالهـا حـل
يابـدر عـنـدي مالـهـا حــل لله=عوج الـردي لـو عدّلـت ماتعـدل
ماعنـدي الا للـردي دقـمـةٍ لــه=وان شفت به ماعفت به قلت لـه ول
رايـي سديـد وراي مثلـك يـدلـه=يابـدر دلـه للسنـع كـان مــادل
حيثـك حكيـم وكـل شـيءٍ بحلـه=وفرصة حلاته يالحويفـي ليـا حـل
وازكى صلاةٍ لا فضـل الخلـق كلـه=اعـداد مـن بالبيـت كبـر وهلـل

البارحه جاني خبر حاسـبٍ لـه=من شاعر غنّا على نايـف التـل
حي الجواب اللـي لفـا بالسجلـه=بيضا بها حبر القلم مثل الأكحـل
جاء من رجل لو ماعنا عانيٍ لـه=والخط لا عادي ولا هـو مسجـل
من صاحبٍ يشكي خطا صاحبٍ له=وانا علـى رد التماثيـل مابحـل
حبيب وجه لي بيوتٍ طـرىّ لـه=مثل الذهب من ضامره زلهن زل
يشكي وانا عندي خبـر بالشكلـه=واسباب ماخلـى الدوافـع تسلـل
سوء التفاهـم يالعريمـه اعضلـه=يكرب على السنه صواميل واتيـل
وانا سمعت اللي حصل بالمجلـه=واخبار لاداعي تطـول وتجـول
هذا خطـا واللـي سعابـه لعلـه=ياخذ حسـاب العاقبـه ويتسهـل
والوضع غامض والعدو يستغلـه=لاشاف عقبـان الوعيـره تناتـل
والعنـف مقـدار الرفاقـه يشلـه=والعقل لـولا المعرفـه ماتكامـل
قدّر رفيقك واحشمه واحتمـل لـه=لو شفت جرفه في نحاك ايتهايـل
والناس تـدري ماحشمتـه مذلـه=تمدح بها عند الرجـال وتجمـل
وتـرا الجبـل ماكـل رشٍ يبلـه=يذري ومن حس الرعد ماتزلـزل
وانا معك واللي فرضت ارتحلـه=واقوم بالواجب عليـه ليـا حـل
بالجاه والحكمـه وسيفـي ماسلـه=وعلى الرفاقه ماتغطرس ولا افعل
ورفيقك اللي بالمثـل مشـرٍ لـه=موضوعكم غيّم نهـار وتمضحـل
مافيه داعـي يابـو نـادر تعلـه=وتصبح هروج بالمجالـس تناقـل
ينشي لها الشيطان حجـه مظلـه=من شان يحكم بالجبر ماتواصـل
وشد القصـاوه بينكـم سبـةٍ لـه=كـلٍ يقـول لصاحبـي ماتنـزل
ياحيف ياللـي تحتمـون المتلـه=من بيتكم كيـف الدقايـق تبـادل
ترا القصا ياناس مانتم هـلٍ لـه=عيب المشاحـن بينكـم يتطـاول
لا ضـاع هـذا ذاك لا يستزلـه=تصبح على ماقيل حصنٍ تصاقـل
مافيه داعـي تنفضـون الاجلـه=من شان لا مشرب ولا فيه ماكـل
لو كـان دار اللـي نباهـم يدلـه=ربعٍ ليا جاورهـم الجـار مامـل
تناكدوا مـن شـان بيـدا مزلـه=من قشعها سود العقـارب تناسـل
وراع الوطن حب الوطن عادتلـه=يجوز من حـب العيـال يتعـادل
لو كان فيها الشوك مثـل الاهلـه=بانظارهم تسوى بساتيـن وفلـل
روضٍ عسى غر السحايب تعلـه=لو كان مابه غير قيعـان وكـول
فيه ام سالم ترفع الصـوت كلـه=تبكي على شوف الزروع وتويـل
مصروفها بالقيض بـروق وجلـه=ياليتهـا يـم الفويلـق تـرحـل
الحب مـن روس الكلالـي تهلـه=وان شافت الجح المصلـع تهـول
هذا المكان اللي ينومس هـلٍ لـه=والا الحزوم اللي بها رمث واعبل
يوم البـداوه صـح للبـدو فلـه=واليوم فارقهـا القبـول وتحـول
بين الموشـم والحـزوم المطلـه=مدهـال بـدوٍ بالمنـادي تنـازل
ثلاثة اشهر من حسـاب الأهلـه=والمال من فوق العـدود يتراسـل
دور مضى للبـدو يازيـن حلـه=يوم البـداوه وضعهـا ماتكنسـل
يوم ان حزمـة رايهـم مستقلـه=ماحل بالديـره مراسيـم وحيـل
اليـا تمالـوا بيـن نجـرٍ ودلـه=والكيف من بين النشامـا تـداول
ربعٍ لـه بالخـوف هيبـه وسلـه=يوم القبايل بالصحـاري تصـاول
كم فرقـوا مابيـن خـلٍ وخلـه=باللي مضاربهن تشل الدمـا شـل
هذا وما يقصر بـه العـرف تلـه=ان كان عرفي عن يمومك تعايـل
واسلم سلمت وجاك خطـي وفلـه=وصلوا على اللي بالرساله توكـل