ياحمـد انـا يابـوك شوفـي تدانـا=تقريـب ثلثينـه فقدتـه مـن العـام
والحيـل والله يالحـوفـي تـوانـا=وحسيت عجزي بالمفاصل واللأقـدام
الله بوصلـك لا يخـيّـب رجـانـا=اميـن يامنـزل تبـارك والانـعـام
اوصيـك بالتقـوى وحفـظ الامانـا=والوالدين حقوقهـم فـرض ولـزام
ابيـك لامـن الـزمـن احتـدانـا=تاقف معي لمصادمـة غبـر الايـام
وتـرى التمسـك بالعبـادة رضانـا=والرزق عند اللي بالأحـوال عـلام
وترى الشريـف وسمعتـه ماتهانـا=والا الجهل ضـد الرجولـه وهـدام
يرميـك مـن روس العـلا لطمانـا=ويرخص مقامك عند ربعك والأخصام
وصحبة ضعيف الدين راس الهوانـا=والله خلق بالنـاس مذمـوم وحشـام
والمرجلـه صحبـة طـوال اليمانـا=اللي عـن الشكـه بعيديـن وكـرام
وصحبة قرين السوء تعـدي ضمانـا=ومن لاحسب للعاقبـه طـاح ماقـام
وعن مايعيب النفـس ربـي نهانـا=وحنا عرب وشعارنا ديـن الاسـلام
الله عـن الفعـل القبيـح يحمـانـا=ويجعل لنا من طاعته درع ووسـام
عسـاه للفعـل الصـواب يهـدانـا=وانـه يجنبنـا المعاصـي والأثـام
تقصيرنـا واجـد وواجـد خطانـا=والله كـريـم وللمنيبـيـن رحــام
الله مراقبـنـا ويعـلـم خـفـانـا=حنـا ننـام وخالـق الكـون مانـام
بامـره تكـونّـا ولــه منتهـانـا=حكمه يدوم وعمـر الانسـان مـادام
ننسـى حقـوق الله وهـو مانسانـا=واعمالنا تحصى على روس الاقـلام
مشاكـل الدنيـا سبـايـب وبـانـا=تضحك لنا وخلافهـا المـوت هـدام
تضحك لنـا الدنيـا ونطـرد شقانـا=ونعيمها فاني مثـل طيـف الأحـلام
الموت وحسـاب المحاسـب ورانـا=مادامت الصحـه وتنعيـم الأجسـام
وصلوا على اللـي للشريعـه دعانـا=اعداد من صلى الفرايض ومن صـام