يا حروف الشعر بالخط السماوي
يا حروف الشعر بالخط السماوي = ارحمن قلبٍ هواجيسه تلوفه
لوف غصنٍ من لهيب الشمس ذاوي = باوّل الكنّة يعاني من احفوفه
يا وجودي يوم حيلتنا المناوي = زاهيٍ به من بديع الصنع نوفه
كنه اللي له ثمان أيام طاوي = أشهب ما طب حلو الزاد جوفه
مثل حرٍ بالسماء للأرض هاوي = أشقر موت الحباري من كفوفه
لا رجس بين الضلوع الذيب عاوي = والضمير الحي هاجوسه يحوفه
قلت شيلوا عزبتي تراي ناوي = مهملٍ قفرٍ ولو دونه كلوفه
ثم سرّيته وثلث الليل ضاوي = حالفٍ قبل الضحى محدٍ يطوفه
عارفٍ ساعة صباحه بالحراوي = اخضرٍ غضٍّ مزاهيرٍ قطوفه
وخويايه من بعيدين الهقاوي = يستحقون الثناء عقب النكوفة
من رجال العز صلفين العزاوي = والنفوس خفاف بالطيب امعسوفة
ياحلو ريح النفل والعشب راوي = من سحابٍ لاح برقه في اقنوفه
الهواية سيّرت رجل المهاوي = لا ومرها القلب سارت في حروفه
انصح اللي للتعب والسير قاوي = لا يفوته مرتعٍ تطرب صنوفه
منزلٍ قفرٍ بعيد الدار داوي = من طراة العمر ريفٍ من ريوفه
شعر \ نافع مطر المرواني
وهذي مجارات الأخ العزيز الشاعر الكبير , عبدالله الفريدي
لقصيدتي السابقة
بسم الله الرحمن الرحيم
تحية طيبة وبعد
هذه مجاراة لقصيدة اخي نافع الحربي والموجودة في ملتقى حرب
ياهجوس الشعر بالقلب الشقاوي = نبضه الاحساس وهمومه رشوفـه
من سنة تسعين والهاجوس كـاوي = خافـق" مـاذاق بالدنيـا مروفـه
ياوجودي وجد من جـذ الرجـاوي = له ثـلاث ايـام بديـار المخوفـه
تاهت اقدامه عـن اليمـه خـلاوي = بالظما والقيـظ واسبـاع" تحوفـه
وانكفى يبحـث نبـات" بالمطـاوي = مايفارق مبسـط الرجليـن شوفـه
منوتي مـاورّده مصنـع عـراوي = دولته فيهـا عـن اليابـان نوفـه
رجّت اليابـان بسـلاح النـواوي = لين بن جابـان مايقـوى وقوفـه
من مصانع جمس والصانع رهاوي = كمّلـه مافيـه للشـراي حـوفـه
مايبـي ياغيـر بنزيـن" نقـاوي = ماتوقف بالـورش تـازن بلوفـه
لالمست ابنص سلطـان الجـلاوي = يجذب المـوال بالحـان امعزوفـه
وان مشيت اعصير والخط امتساوي = ماتشوف من الطريـق الاّ كتوفـه
وان تسنـد ماتحـداه الـنـزاوي = مايهمـه لانـفـود ولا جـروفـه
وان تحدّر من رفاع الـى مهـاوي = كنه الطيّه مـن الطـيّ امحذوفـه
ماعليـه الا الدريـول والمخـاوي = والميانـه طايحـة مابـه كلوفـه
بينهـم ياماحـلا زج الـحـداوي = باللحون اللـي تنسيـك الكسوفـه
مع خثال ولا مشوا خـد" سنـاوي = مع نبات الوسم وان كثرت صنوفه
غيرها ماني على الدنيـا شفـاوي = ماصفت قبلي لمن جمّـع اولوفـه
الشاعر : عبدالله عبد الرحمن الفريدي