بالوصل ومواجهك للي تودّه=زرع الغلا يثمر ويخضـرّ عوده
ترى البطى يثـّـر وتاليه صـّـده=ولا فيه خصله بالصـّـدود محموده
والصـّـد سيف ٍ يقطع النفس حدّه=مع الجفاء شر ٍ عليه ويزوده
واصل رفيقك كل ما مر مدّه=لا تقطعه والوصل طبـّـق بنوده
وكثر المواجه للغلا فيه لدّه=يذبل غلا وصل ٍ تجاوز حدوده
باب الجفا حاول بعزمك تردّه=والنفس دايم صدّها لاتروده
ترى النفوس بغيضها مستبدّه=خسران نفسه من هواها يقوده
نتيجة اللي زاد تأتيك ضدّه=وكل ٍ يبي يلقى حصيلة جهوده
وكل ٍ عطه ثوب من الوصل قدّه=وإحذر عليك إبليس يرسل جنوده
مافات من وقتك فلا تستردّه=الوقت يمضي والليال معدوده
وإلا رفيق ٍ بالسـّـعه فيه هدّه=وتقصر بحزّات اللوازم زنوده
بالك معه حبل المواصل تمدّه=أخير من وصله جفاه وصدوده
أرخ الحبل من يمته لا تشدّه=يوم الزعل شر الظمير ووقوده
كد قيل : علم ٍ تستحي منه بدّه=خشية كنينه يرهقنك لهوده
وباب ٍ جلبلك ريح بالعزم سدّه=خوف ٍ يشم الجرح لا(عط) عوده
وإدمح خطأ مغليك وإصفح وعدّه=تزود ما تنقص وهو ما يعوده
وإن كرره لو الخطأ ويش ندّه=إوقف له بعروة غلا ومعقوده
إليا إختلط بالعلم هزله وجدّه=جنــّـب عنه لو شفت سكبة عموده
واللي بليا ساس ينهاز حدّه=والعالم الله والخلايق شهوده
اليانع المثمر يجي من يجدّه=والرجل تعرف قيمته من صموده