محمـد سـعـد اليـوبـي =
ياصقر بعد الهواء مـاراق=والقلب هاضت به شجونـه
سلام مثـل الحيـا لاسـاق=للخيف ثـم أركـز مزونـه
خالد بـن عبيـد الاحمـدي=
من قلب لهل الوفا مشتـاق=ترحيـب للـي يعـزونـه
اعـداد ماسجلـوا بـوراق=ابيـات جزلـه وموزونـه
محمـد سـعـد اليـوبـي=
خيَّلت لي في السماء بـراق=والناس في الضلع يرعونه
دورت لي يمهـم مطـراق=وخيف الصّبَخ حال من دونه
خالد بـن عبيـد الاحمـدي=
الغيث قسمه مـن الخـلاق=مايحكمـه مـن يخيلونـه
ولولا المودات والاشـواق=محد ٍ ذكر قيـس بجنونـه
محمـد سـعـد اليـوبـي=
خوفي يجي حال ما ينطـاق=لضيَّـع الحـق مامـونـه
ناسٍ حدتهم كثيـر أطـواق=وناسٍ ليا صـاف يجنونـه
خالد بـن عبيـد الاحمـدي=
لاتخاف ياطيـب الاعـراق=فرحتك بالصبـر مرهونـه
واللي لقا بالطريق اعـواق=بالعـزم يظفـر بمضنونـه
محمـد سـعـد اليـوبـي =
لاهنت والناس تبغى أذواق=والطيب النـاس يشرونـه
ولابد بعد الغروب اشـراق=ويميِّـل الـورد بفنـونـه
خالد بـن عبيـد الاحمـدي=
مبـداك ياطيـب الاخـلاق=النـاس بالمـدح يطرونـه
والحر عزمه وصـل آفـاق=واللـي يجهلـوه يشوونـه
وان كان وقتك عليكم شاق=الحكـم لـلـي تعبـدونـه
وطبع اللقا ينختـم بفـراق=سنّه على الخلق مسنونـه