يا راكب من عندنا فوق فاكسار=آخر موديل اثنين عقب الثنيني
فاكس جديد وصمم الفاكس بيطار=من مصنع اليابان توه يجيني
يم السوالم والمساريح مسيار=قطعانهم بحد المحايد تبيني
وان لاوحو من لاعج الوسم سمار=ماطاوعو شور الثبور الدويني
تشاورو عقب المسانيد محدار=ماكفته لاهه شمال ويميني
اللي هواهم من هوى حص الاوبار=ليا شان خاطرها هواهم يشيني
" حروب " بالزرفات يرعون الاقفار=مارددن بالقيد فج الايديني
مثل النعام اللي ترايع ولاطار=صار الخبر مابين شك ويقيني
عمّيت انا ياصاح ربعي هل الكار=ريف الهشالا مدلهين الحزيني
ماقدمو دون المواجيب معذار=كل على الخطار يبت اليقيني
وقولة هلا حييت ياضيف ومجار=طبع لهم لو شلفحن السنيني
خلاّطة للبن والهيل وكدار=ولا حسبو كثر الثمن بالسميني
وكم واحد يملك من المال مليار=ودايم على دنياه مثل السجيني
لامكيّف نفسه ولامدّله جار=حزين قلب ويفرك الراحتيني
من خوف لاينقص من المال دينار=شاق شقاه لراحة الوراثيني
ماهيضنه شوف العشاير ولاثار=هاجوس قلبه شوفهن كل حيني
بصورة جتني وفيها النظر حار=حار النظر وانباح مني كنيني
وعداد من طاف الحرمين زوار=صلو على اللي لملته تابعيني