حمَلت بيت القصيد اليوم من فكري=البيت كنه جمل وحموله المعنى
نصيتبه شاعر (ن) وسط السما بدري=والكل شاف البدر والكل به يهنا
سلام مثل الذهب ياعالي القدري=وأحلا من الشهد صافي عالي المجنا
واليوم حرف المثل مرسول لك حصري=نبغى الإفادات تكتب حسب ما جبنا
أشكي عليك الذي شفته حفر قبري=من يوم حث الخطا وحنا ولا كنا
حاولت أعدل طريق العمر من بدري=لكن سمه تمكن من جوارحنا
رحلت عنه ..ربطت القلب لا يسري=لعل طول الليالي تزيل ما شفنا
لكن بعده يزيد الجرح في صدري=ولا أظن في يوم ربي فيه يجمعنا
مثل السجل أنطوى وأنقص مدى عمري=بعد الصفا بيننا ..يايروح ..يارحنا
وأنا الذي بانين في ساحته قصري=وأملت روحي ..خسارة بالأمل ضعنا
خلا جروحي في جوف القلب ما تبري=خلاص ..ما عاد كل الطب يقنعنا
ياطير ود الرسايل طلعة الفجري=سلم على صاحبي وأبلغ معزتنا

أبياتكم هيضت مثل السحب شعري=نختار منها جزيل الحرف والمبنى
يا مرحبا بقاري الإنسان والعصري=تعداد ما حروفها تعانق مسامعنا
واظهر هداها علوم الكوفي والبصري=تجلا سواد الغرر عن حال واقعنا
من نورها نستبين لكل ما يطري=نحسب حساب الخُطى وناخذ مواقفنا
والنجم فيه الدّلالة بالذي يجري=نمشي على ضوّها من حكم خالقنا
مأجور يا صاحبي فالعسر واليسري=في موقفك والذي حرّك مواجعنا
ومفارِقك يا رفيق العمر ما تدري=كيف اللقا ينكتب من شيِّ قدمنا
له الأثر ما حيينا بالأمل يغري=مما مضى ينجلي حاضر يطالعنا
أحسن لظنَّك بربّاً مالك الأمري=الدايم وكل شي من حكمته يفنى
وازرع فيومك أمل من طيِّب الذكري=تلقاه حسب الذي نصّت مراجعنا
اليوم باعوام لك يا طالب الأجري=عمق التدبّر عن الجهّال يرفعنا
واحرص بخوف ورجا والفوز لك محري=واسأل ثبات الهدى ويحسن خواتمنا
واتلى كلامي سلاام ازكى من العطري=وصلوا على الخاتم المختار سيدنا