السلام عليكم ورحمة الله وبركاته
كنا ولانزال مجموعة اصدقاء ولنا استراحه نجتمع بها كل ليله وبطبيعة الحال وضعنا امير لنا وهو امير من الطبيعه وكذلك امير باخلاقه هذا الامير اختارني نائب له وكانت المجموعه جدا متعاونه معي لكن بعض الاشخاص من خارج المجموعه اللي لاهو ضيف ولا مشارك ولااعرف اصنفه قليل احسان وطويل لسان وكان كثير الطلابات وياليت يمسك لسانه واذا طلب من الامير حاجه قال له شوف النائب قلت ياعزيزي الامير انت موجود مدامك موجود مالي شغل وبعدين هذا دعواه مايقدر عليها الا الامير اصلا مايعترف هو بالنائب وانا يالامير ابيك تعفيني من هذا المنصب ولايصير ترمي عليه جميع المهام وبعض البشر صعب التعامل معه والله لايهينك تعفيني من هالمنصب قال اعفيك بشرط وماهو الشرط وكان في هذه الاثناء التلفزيون على محطة الساحه وفيه محاوره وموال بلحن شامي ولحن اغنية ((ياعين موليتا وثنعش موليه-جسر الحديد انكسر من دوس رجليه )) تجيب عدة ابيات بهذا اللحن وغير هذا مانقبل منك اي معروض قلت حيل الله اقوى استلم ياعزيزي
يامير معاد انا نايب لحضرتكم =مدام شانة علي يامير لهجتكم
مر حط في منصبي من بعض شركتكم=ارجوك من منصبي يامير تعفيني
اعرف سر الرجل من نظرت اعيونه=وافهم هدف كلمته لو جات مدفونه
ومن سن له سنه(ن) ماهي بمسنونه=ماني خويه بعدها لايخاويني
موضوعنا له شطون ولاكمل نصه=احد يخصه واحد يالقرم ماخصه
ولافيه فاصل بعده نكمل القصه=وديان كل البشر مايترك الديني
الكلمه ام الاسم يامير سوقيه=مهي بلك ياسعد وانا ماهي ليه
ماسوقها ياسعد لاتسوقها ليه=ومن ساقها قلت سقها لاتخاويني
البارحه وانت بالاسماع توحيها=وتعرف رمايها وينه موديها
يالله تستر علينا من مواذيها=من انسنا اللي تلبسها شياطيني
اللي تجازي عن الحسنا بسيتها=لو هي رفاقه تعيفك برفاقتها
ابكو على اهل النزاهه مع نزاهتها=بقعاء تخير نوادير الشياهيني
يالله ياساتر الاجواد في سترك=يمن يسبح جميع الكون في شكرك
استر على اللي لسانه رطب في ذكرك =وإلا البشر خلق وضعوف ومساكيني
وبعد ماسمع الموال قال والله حنا مانقدر نفرط بك لكن ابي اتنازل لك عن الاماره قلت مدام مامن فكه الله يعيني ومنصبك مقبول وموفور ولاهو بعدك انا في منصبي الاول بس المشكله هذا خل دعواه عندك والباقي عليه ولاتهون ولايهونون جميع المتابعين