تغير اسمك حمر ياناصر البشـري=وانا سماوي مثل ماكنـت ياناصـر
شفت الخبر بالشريط الأحمر المقري=وقلت استهلت نبي ننشد عن الماطر
الله يرفع قدر شخصٍ رفـع قـدري=فاتت عليكم وحق الطبـع للناشـر
والا انت شايب كبير السن ومهذري=مابك نشاطٍ ياكود لسانك الشاعـر
خابرك يوم نغزي عمرك كبرعمري=والسحر لاتتبعه يقلب على الساحر
من قبل مايعلنون الترقيه نـدري=والخاسر المشتري والرابح التاجر
لا صرت تدري على ما قلت من بدري=ما قلت مبروك ليّـه غيـر بالآخـر
تبي تغرّ العرب في هرجك السحـري=لاشك ما هو علي اسلوبـك الماكـر
اثرك ماطبت من وسواسك القهري=اليا توضيت قلت الماء ماهو طاهر
كان انت ماطبت عندي قروة تبري=علاج وحده بوحده تبري الحاشـر
الكون لو ضاق كله ما انحشر صدري=وأقرأ على الجن واشهد توبة الفاجر
بس انت متغيرن ما انته على خبري=الشيـب داخلـك وتخفّيـه وتكابـر
الظاهر انك قلبت بمدخـل الكبـري=انته ترقدت واسلـم جنـك الكافـر
ودك تصيد وشيبك جفـل القمـري=صورتك خدعه والا انته شايبن دامر
اللي ذبحني غزال بحبه العذري=اردوفها بارزة لو بطنها ضامر
تقول ذنبي عليك ولاقبلت عذري=بلوى تبلّت خويك وانته تناظـر
احذر توهق وفكر قبل ما تشـري=بالليل ماتعرف البكره من الفاطر
اختار بين الثلاث الأصغر العفري=وتراك خابر وانا باللي جرى خابر
القسمة اللي يرجّحها عدد عشـري=ما لي بها يارفيق الدرب من خاطر
لو كان قلبي على كيفي وتحت امري=اخترت من هالثلاث الطيـب النـادر
خذ النصيحه صحيحه قبل مانسري=الدرب ملغوم يا ابن العـم لاتغامـر
اقصر اخطاك ويجيلك صاحبك يجري=ارم الشبك له وخلك حاذق وماهـر
ياسعود صدري هو المستودع لسرّي=والا الليالي حبالى والزمـن عاقـر
كان الـذرى لايظلّلنـا ولا يـذري=عيبٍ على اللي يطاول ظلّه القاصـر
اليا اوفيت في نذرك انا اوفيت في نذري=والدين ممنوع ندفع حاضـر بحاضـر
ادفن ويدفن معي سـرك وانـا بقبـري=اموت ما قـال قـوال العـرب غـادر
ياسعود يعجز على توصيفها فكري=سبحان ربٍ خلق فيها الحلا ظاهر
كن الحلا مكتسيها والدلع فطـري=اموت واحيا بنظرة طرفها الخادر