*يا غازي مغيران كيـف انت وابـطيت
لــو ان لك مـيـقاف شـقر الـجناحي
حـرٍ علـى مـدعاك مـع حـرب هدّيت
لـولا اخـتـلاف الـلازمـه والـسـلاحي
لـ اقـول مـن دون الـقـبيله دنـامـيت
واسـلاحـهـا الفـتّاك فـ ايّ الـنواحي
أوحـيـت عـلـم وظـنتي مثلي اوحيت
كـانـك عـلـى خـبـري صبي الفلاحي
مـرضـيـك والا نـخـلط الـنار بالـزيت
قـبـل نـقـول الـمـعذره والـسماحي
بـتـسد والا انّـي عـن الشـك سـدّيت
فـرض ٍ لـيـا اقـمـناه طـاب المراحي
الـكـوت عـقـب انّـه كبر صار الكويت
لـيـته عـلـى الاسـم القديم استراحي
واكـبـر خـطا بـ اعـرافنا لـ استدليت
لا لِـبّـس الـمـشلح ابـدال الـوشاحي
مـن يـوم عـدّى فـالطـويـله تـحـاليت
وقّـف وطـارت بـه هـبـوب الـرياحي
مـاهـو بـمـيقـافن عـلى حسن تثبيت
مـيـقافـن اقـرب مـايـكـون انبطاحي
لـولاي مـونـس لـ الـخطا مـاتقصّيت
ولانـزلـت الـضـيـق عـقب البـيـاحي*
فـ بن طـفـيـح ومـايـقـولـه تـقـدّيت
لــو يـخلـط الجـدّه فـ بعض المزاحي
شــديـت لحـروفـي معـاني وقضّيت
وشيـطـانك ان مـافـاق مـانته مباحي
لك فـالـقضـيّه سـلك وبـ قـافية بيـت
حـرفيـن والـثالـث سـمـي القـراحي
تـفـصيـح والا مـثلك الـعلم لـ اخفيت
يــدري بـما تـحـوي بـطون اللـقاحي
خـابـرني الـدكـتـور عـن عـلّة الميت
لاشـك مـاثـاب الـمـريض الـنـيـاحي
خــذيـت درس لـمـقـبـلاتـه تـحـريت
قـبـل الــمـرض نقل العلاج المتاحي
وضــع الـتـمـام اخـذتـله و استعدّيت
فـالبـنـدق اللـي رمـيهـا بطـن راحي
وانـا تـرى بـاللي مـضـآ مـاتـراخيت
لـي بـيـرقـن مـاقـيل بالسبق طاحي
لـكن قـنـعـت بتـالي الـوقت وانحيت
عقـب الـخفير انـدار واطـلق سراحي
لـ اقـديت خـير وكان بالقول م اقديت
يغـفرلي المـجري لـ نـور الـصباحي
حـفرت بـيـر وكـان لـ البـيـر غـطّيت
لـك الـتحـيّـه يـاوسـيـع الـمــنـاحي
للشاعر بدر الهبيري
::
:
رد الشاعر غازي الزغيبي
لاهنت يابن عيد ياطيّب الصيت
ياللي بشعره حايزن لرتياحي
واسند علي وبالحقيقه توقيت
لو ان بعض الهرج ماهو مباحي
أسند علي وقلت كفّيت واوفيت
من ضمنهن بندين غير امتداحي
البند الاول راكبن وين ماشيت
وموجهه مني يريد اقتراحي
واقول مبدا النار من عود كبريت
ثم بعدها يالمحترم وش تناحي
الاوله في جملة الوضع ما اعنيت
لا لك بعير يساق ولا انته متاحي
وترى الشوش تعقيدها ل الشماميت
اللي ورى الهرجه تطق السباحي
وانته بعيني يا ابيض الوجه زنتيت
اما مثل مستور والا الرياحي
سيفن يهدّي طايشين الطواغيت
يحسب حسابه من سيوف النطاحي
لاجا نهارن مثل ما ابنيبه البيت
لهوه يقص الجمجمه واللواحي
وان كان تنشد يابعيد المناعيت
ياسهيل منزالك عن النجم ناحي
اقصا مواصيلي من السوق للبيت
أساير الدنيا بعزم وكفاحي
والبعد ماهو بالسهال السباريت
البعد والله ب اختلاف المشاحي
والميل تفرح فيه خطوى السفاريت
والا انت تكرم عن خطاة الضياحي
يحتاج له بين الرجاجيل تسكيت
لا تصير ظاهرته برجل انفتاحي
للحج والعمره شروط ومواقيت
أيضا وقالوا بالثبات الرجاحي
وتراك ماتندم اليا من تساميت
عن هزلتن فيها الشكوك متواحي
بالناس يهرج كيت والسالفه كيت
كرمة ولد معجب تهمّش مناحي
زادٍ يقدم به على الكبد حلتيت
والرجل ودك للمواقيف صاحي