خالد بن عبيد بن معتوق الأحمدي
سلام تثمينه يفكّ النّاس من بعض الكلام
يمشي على ضو القمر لو القمر يشبه ضياه
ابو محمد من زمن مانسمعه ردّ السّلام
وماهي بعاده فالوفي اللي شهَدنا في وفاه
بخيتان بن بخيّت البشري
ترحيب وافي بالرجال اللي لهم كل احترام
مثل الخيال اللي بروقه شفتها ماشفت ماه
ابو محمد من زمن سهران عينه ماتنام
اللي شهدتوا في وفاه الوقت ماغير بناه
خالد بن عبيد بن معتوق الأحمدي
دام البقا دام الوفا مازال فقلوب الكِرام
أقبل ظلام الليل مير النّجم مانوّر سماه
لدّيت عيني فالشّجر فالغُصن ماشافت حَمَامَ
واقفيت عن وادي من أوّل كان يجذبني هواه
بخيتان بن بخيّت البشري
عِدّ الوفا يابن عبيد اليوم ماحوله زِحام
نجم الثّريّا في سماه ومعتلي عمّا سواه
لدّيت عيني فالسّما ماشفت فيها صقر حام
وآنا من أوّل خابره فالجو يقنص مابغاه
خالد بن عبيد بن معتوق الأحمدي
الجوهره من سامها في سِعرها حسب الجِرام
يلقى زباين تدفع الغالي وترفع مستواه
وانا لقيت افسوقها عاصم يبي يطرح عِصام
وعصام مايدري عن اللي يمكره عاصم وراه
بخيتان بن بخيّت البشري
الدُّرّ غالي ياعريب الجَدّ والغالي يُسام
وماكُلّ تاجِر فالعرب دُرّ الجواهر مُقتناه
عصام يدري وش ورى عاصم ولايبغى ملام
عاصم حبكها خُطّته وعصام جا واظهر خفاه
خالد بن عبيد بن معتوق الأحمدي
ابديت تحليلك ورايك مير مايبدو تمام
بعض الكلام نوافقه والبعض عارضنا خطاه
وماهي غريبه لو حُسام يقوم ويشيل الحُسام
بس الغريبه يكسر بيمناه يُمنى من حماه
بخيتان بن بخيّت البشري
كُلّاً وله وجهت نظر ماهي سوى فالاهتمام
كُلّاً على دربه مشى واللي كتب خطّه قراه
يابو عبيد معاملتكم مامشت حسب النّظام
ارجع وعيد أرقامها والعم ياصل منتهاه