ياهجوس الشعر بالقلب الشقاوي=نبضه الاحساس وهمومه رشوفه
من سنة تسعين والهاجوس كاوي=خافق" ماذاق بالدنيا مروفه
ياوجودي وجد من جذ الرجاوي=له ثلاث ايام بديار المخوفه
تاهت اقدامه عن اليمه خلاوي=بالظما والقيظ واسباع" تحوفه
وانكفى يبحث نبات" بالمطاوي=مايفارق مبسط الرجلين شوفه
منوتي ماورّده مصنع عراوي=دولته فيها عن اليابان نوفه
رجّت اليابان بسلاح النواوي=لين بن جابان مايقوى وقوفه
من مصانع جمس والصانع رهاوي=كمّله مافيه للشراي حوفه
مايبي ياغير بنزين" نقاوي=ماتوقف بالورش تازن بلوفه
لالمست البنص سلطان الجلاوي=يجذب الموال بالحان امعزوفه
وان مشيت اعصير والخط امتساوي=ماتشوف من الطريق الاّ كتوفه
وان تسند ماتحداه النزاوي=مايهمه لانفود ولا جروفه
وان تحدّر من رفاع الى مهاوي=كنه الطيّه من الطيّ امحذوفه
ماعليه الا الدريول والمخاوي=والميانه طايحة مابه كلوفه
بينهم ياماحلا زج الحداوي=باللحون اللي تنسيك الكسوفه
مع خثال ولا مشوا خد" سناوي=مع نبات الوسم وان كثرت صنوفه
غيرها ماني على الدنيا شفاوي=ماصفت قبلي لمن جمّع اولوفه