يالله ياللـي بالفلـك تعـلـم الغـيـب=ياللـي عليـك بكـل حـال اعتمـادي
ياوامرٍ موسـى علـى جيـرة شعيـب=وبامرك نطق عيسى وهـو بالمهـادي
ياللي بحكمك تطلـع الشمـس وتغيـب=ياباسـط سـبـعٍ وسـبـعٍ شــدادي
مرسي على وجه البسيطـة غرابيـب=محصـي عـدد حيوانهـا والجمـادي
بك نستجير من الخطـاا والنشاشيـب=وعـن حجـة النـقـاد والأنتـقـادي
هـذا ويـوم القيـل جالـه هنـاديـب=ونـادى لمكنـون القريحـه مـنـادي
اسمع كلام اللي كسـا راسـه الشيـب=على النقـا مـاداس طـرق السـوادي
يامرحبا من مهجـة القلـب ترحيـب=ترحيـب مخلـص مايكنـه فــوادي
بالصاحب اللـي لـه علّيـه مواجيـب=وليّـه علـى رجـل المـروه مبـادي
أخص ابـو تركـي نزيـه الأساليـب=ساعات وصلـه مـن ليالـي عيـادي
ممنون للطيب وانا مـع هـل الطيـب=ماحـب يحصـل بالنفـوس انعقـادي
طلعه ورى الهقوه عطـب المخاليـب=فعلـه يشجعنـي وطلـعـه ركــادي
محشوم ماهو مـن طيـور المغاريـب=اللـي توصّـف بالرخـم والحـنـادي
رجـلٍ فتـح لمجـاد ربعـه دواليـب=واحيـا الفعـول الماضيـه والجـدادي
ينفي عن الواقـع اسلـوب الأكاذيـب=عـن مصـدرٍ ماثـوق ماهـو دوادي
والعرف والحنكه حظـوظ ومواهيـب=وفايز على الحنكـه تسيطـر وكـادي
حامـل شهـاده بعـد دوره وتدريـب=وانـا دروسـي مـن طبيعـة بـلادي
وصنّف ووجّه لـي بيـوتٍ مساحيـب=في خارطـه ماتندمـج فـي حفـادي
أختـار صافيهـا وخلـى الغثـاريـب=ياكبرهـا مـن صاحبـي ياهـجـادي
ماشوف لي فيهـا ملامـس مقاضيـب=ملسـا هدفهـا يالـديـب امتـيـادي
وشطبتها في روس الأقـلام تشطيـب=مانـي مدّخلهـا لـسـوق الـمـزادي
خايـف شرارتهـا تولـع مشاهـيـب=يحـول دون المستحـيـل العـنـادي
وان كـان فايـز مايهـز المشاعيـب=وعلـى الرفاقـه مايشيـل الـهـوادي
مثله تـرى مانـي قريّـب محاضيـب=وعلـى القرابـه مايشـرر زنــادي
وان طب سوقـي للمشاكـل جلاليـب=قصـرت للبـاع الطويـل القـيـادي
مابـي طمـع لمفتلـيـن الأشانـيـب=لصـار مـن بيـن النشامـا طـرادي
عنفـي يهـدي عنفـوان الأصاعيـب=قاسـي ولـيـن للرفـاقـه مـقـادي
ولاني على العالـم مـوزع مصاليـب=وعـن مايثيـر الخافيـات انـفـرادي
وليا حصـل لـي شتلـةٍ بالعراقيـب=مافيـه داعـي للبسيـط الضـمـادي
الوجـه سالـم والسلامـه مكاسـيـب=والنـاس تـدري بالخطـا والقـوادي
ولـو كـل مادبـت علينـا دبـاديـب=من بعض مانسمـع هجرنـا الرقـادي
كم كلمة قيلـت وراحـت ذباذيـب=مايلفـت الأنظـار غيـر الـوكـادي
واللي يسربهـا مـع النـاس تسريـب=اخـف عقلـه مـن جنـاح الجـرادي
ماهيـب محتاجـه تقصـي وتنقـيـب=لاهوبهـا يقضـي عليـه الـبـرادي
لاجمّـدت نشفـت حلـوق الدغاليـب=اللـي تلـوث بالنظـيـف الفـسـادي
يافايـز الموسـى حصـان الطاليـب=ترى الهـدف مالـه بسيـرك مسـادي
من بيننا مـا يدخـل الشـك وريـب=نحو الهدف من بحر الأطلس وغـادي
لهجـه ملافيهـا قلـوب النصاصيـب=وعنهـا مجـال الطيبيـن اتـحـادي
براتهـم بـراة يوسـف مـن الذيـب=واللي يجادل صاحـب العقـل غـادي
ختمتهـا بأشـرف تحيـه وتهـذيـب=والله يوفقـنـا طـريـق الـرشـادي
وصلوا على اللي حارب الشرك تحريب=على الرسول اللـي للأسـلام هـادي