كنت اعتقد بالحب مافيـه هجـران=لين الزمـن قدّر بقسوه عليّـه
شفت العيون اللي تسلهم بالانسان=ترميـه فـي سكـّة رداة المنيّـه
عـزّاه ياحب(ن)عايشتـه ازمـان=متربّع(ن)وسط الحشى بلا حميّـه
هجرتني واقفيت نـادم وحيـران=اضرب بكف(ن)كف والحزن فيّـه
وتركتني يشمت بي فلان وفـلان=كنّك عطيت العـاذل اكبـر هديّـه
البعد شين وصاحبه دوم خسـران=والهم يبنـي فـي فـؤاده خليّـه
ولازارني طيفك في بعض الاحيان=يبقى لحبـك فـي خفوقـي بقيّـه
تهزمني العبرات من دون ميـدان=ويلاه يـا خل(ن)تركنـي ضحيّـه
حتى القريب لحالتي صار زعـلان=ودمعه على الخدين يجري شويّـه
كم قلت لي منساك يانور الاعيـان=وتركتني من دون ذنـب وخطيّـه
ياهاجس الضيقه ترى الدمع حيران=فالبُعد خلّـي قـرّب المـوت ليّـه
كنّي بسجن(ن)خالي بدون سجّـان=ولأ عليل(ن)مـا تداويـه كـيّـه
وكنّي فبحر بـلا سفينـه وربـان=تضرب به الامواج في كـل سيّـه
يا الله يا منزل بقدرتك قـرآن=ياواحد(ن)ندعيه صبـح وعشيّـه
ارجيك يارب(ن)عظيم(ن)ورحمـن=تجبر فؤاد اللـي حياتـه شقيّـه
(ناصربن مصلح الاحمدي)=