ابطى علينا الغيث زلت حراويه = والارض من جور الدهر ماتجودي
يبس الشجر والعد جفت مراويه = وان مارحمنا الله تباح السدودي
والجو دخان المصانع مغطيه =هواه لاجانا يعقب لهودي
يالله من مزن (ن) يجي من مناشيه =مثل الهضاب النايفات الحيودي
نواض براقه بدا في معاليه = وينزل لحد الارض مثل العمودي
وليا برق قمنا على البعد نرعيه= وانقول ياربي تحل العقودي
نسبح الخالق ونطلب وندعيه = ونقول غثنا ياصمد ياودودي
هبت له الغربي وجتنا تمشيه = واقبل خياله في سمانا يقودي
وليا وصل وقفت هبوب تباريه = ركز علينا واستمر الركودي
ياخذ ثلاثة ايام مدة لياليه = اليالمع برقه يدن الرعودي
واليانقص وبله منشيه يحييه= هتان وبله كل ساعة يزودي
ماينقطع عنا بقدرة منشيه = يالين تروى العالية والمهودي
خير(ن) بلا شر(ن) يجي في قوافيه = سقياه سقيا رحمة للوجودي
يسقي ديار(ن) تطلب الله وترجيه = غيث(ن) يعم جبالها والنفودي
الشعب سال وضاق بالسيل واديه = سيل(ن) حدر من عاليات السنودي
نبت المراعي بان مازل ثانيه= والما تكون في جميع السدودي
والزرع خضر ثم طالت نواميه = والارض صار النفع فيها يسودي
والعد جم وكل من جاه يرويه = ولاعاد يشكي من كثير الورودي
والجو صافي والكدر مايجي فيه = زالت سموم (ن )جعلها ماتعودي
راح الغبار وكل ماكان نشكيه = وجانا هوا يبري عليل الكبودي
نستنشق انسامه ونرعي سواريه = انسام مخلوطة بعطر الورودي
ماهمنا الا نشكر الله ونرضيه = احمدك ياربي ولا ني جحودي