يا أهل المواقف والقلوب الرحيمة = ياللي لكم بالطيبة صيت واذكار
لقيت بنحور المصايب يتيمة = لو كان أبوها وأمها مع أهل الدار
زوجة أبوها مسرحٍ للجريمة = وزوج أمها مع جور الأيام جبار
تجرّعت ذل الحياة السقيمة = وتزوّجت عودٍ عليه الكبر جار
عودٍ حريمه ساطيات الشكيمة = لا خاصمنّه عن هوا الحق يندار
وصار اليتيمة في حماها يتيمة = اللي جرى للأم مع بنتها صار
حياتها صارت عليها ضليمة = مطلقة ملها مع الناس مقدار
من المرض والجوع ماهي سليمة = تشكي حياةٍ كلها حزن وامرار
زرع بها جور الزمان ونديمه = ما تزرع الحاجة على وجيه الأحرار
ترجي زهر غيثٍ حرمها نسيمه = وتخفي جروحٍ تلتهب كنها نار
الآدمي ماله مع الفقر قيمة = به يستغل الفقر مجرم وسمسار
يابنت مايجلى الهموم المقيمة = إلا الذي يأمر سحابه بالأمطار
محي العظام الباليات الرميمة = اللي يخر لسطوته كل جبّار
توجّهي لرضاه ورجي نعيمه = يوم ان سيرك مع اهل الجود ما سار
تصبّري والصبر تاج العزيمة = ولا خاب عبدٍ لمر الإله صبّار
قالوا بعلم المفردات القديمة = يمكن يدور الوقت والوقت دوار