ياونتي بالروح مااصعب ادواها = فيها صناديق الظماير يضيقن
وياطي حالي طي طيٍ طواها = طي الحديد اللي تقدم به الفن
عيني سهج رمانة الخد ماها = ذوارفٍ من ما حشرهن يميعن
الأرض ضاقت ما حملني فضاها = علي وسيعات المعابير ضاقن
الشيب كحلي الضفاير غشاها = قامن على سود الضفاير يلوحن
ومن لا يحسّب للأمور وخفاها = خطرن عليه بتالي الوقت ينجن
أما صبر والصبرحاله براها = ولاّ تكلّم ولحم الشن بالشن
شكيت أنا الدنيا على من شكاها = وعطاني العلم الصحيح المبطّن
قال احترص والكبد برّد ضماها = مدام تقدر والمصادير يردن
دنياك غدارة من اول صباها = دايم على الاجواد رمحٍ مسنّن
تمشي على غير الهوى في هواها = واسنينها بالخير والشر يطون
أزريت أميز غيضها من ارضاها = ضاع الدليل وفيه الاشوار تاهن
مرّ النهار وقصتي ما قراها = إلا شفق خرسٍ على الصم يِقرن
عشقت لي عيطا رفيعٍ حجاها = ونا صغير السن سبعٍ يشحّن
من دونها حالي طواها عناها = عشرٍ على عشرٍ وعشرٍ يزيدن
عشرٍ ألاعبها على مستواها = وعشرٍ تلاعبني والانياب يبدن
وعشرٍ تحاكمني بحكمة قضاها = ولا من سلامة والمحاديب يكون
ملّيت من دنياً وسمني جفاها = وسمٍ بغضات اللواجي تمكن
لواهني من باعها مشتراها = لو يربح الدولار من عملة اليَن
نفسه على خير المكارم حداها = في طاعة الله قبل الايام يقضن
كم واحدٍ له حاجةٍ ماقضاها = يريدها مير المقاديرعيّن
قضا حياته في حراوي رجاها = واليا ذكر له حاجةٍ قبلها ون
جاه الكبر والشيب حاله شواها = فارق اصباه وفيه الايام بارن
وكم واحدٍ جزل المعاني حواها = يضخر بيوتٍ بالمواجيب يافن
نفسه يحقق بالنوادر امناها = بمهندساتٍ لاندبهن يطيعن
وكم واحدٍ بالسيف داره حماها = على الكحيلة كنّه السبع بالجن
كم سابقٍ في حد سيفه رماها = بمصقلٍ منه التراقي يجضّن
وكم واحدٍ ناره ينادي سناها = ودلاله عن جمر الغضا مايتوارن
صفرٍ على نار الكرامة جذاها = بالهيل والبن اليماني يفوحن
من بن صنعا حبها قدر ماها = بمغريفاتٍ يزهن الهيل والبن