ياحياةٍ نسايرها بعزمٍ وشدة
من يعد الليالي والليالي تعده = اشهد انه حزين القلب ماهو بســـــــــــــــــالي
ياحياةٍ نسايرها بعزمٍ وشدة = طار فيها زمنها وعتلقها جــــــــــــــــــــفالي
كم قويٍّ قوي العزم حيله تهده = لين تثنّيه تثنيت الجمل بالعـــــــــــــــــقالي
كل ماسار سيري مع رفيقٍ أوده = غاب عني وخلاني وحـــــــــــــــــيدٍ لحالي
ماطواه الزمن لايمكن انك ترده = كيف تقدر ترد اللي على القـــــــلب غالي
ياجزيل المعاني مالك اليوم صدة = كان ماشفيت صدري منت جزل المقالي
كل مالاح برقٍ بالغيوم المسِدّة = ارهش القلب يتبع مرهشات الخـــــــــيالي
ياسحابٍ نزل بالعيلم المجرهدّة = طاب وبله على قفرٍ من الناس خـــالي
لاتخلي خويك والليالي تحده = ونت تدري ماهو عقبك سليم الحــــــوالي
مايحب النمايم والوجيه المصِدّة = ولايحب الحرام ورغبته بالحـــــــــلالي
منوته خوّة اللي ثوب الامجاد قده = صيرميٍّ على طول المــــــناعير طالي
العرب كل مسعورٍ معرّط ببدّه = والليالي غروب ومنزلٍ وارتحـــــــــالي
الردي لاتعزوابه ولا فيه شدة = فاتر الحيل مايقدر يشيل الثقالي
يوم دخن شواط المطرقة فوق خده = صاحب الكلب غواّله وعاف القتالي
نافع مطر المرواني