يا منيف أنا ليه مضنه وملجاه = صديقي الوافي وساعد يميني
أزريت لا اصبر يالسنافي بلاياه = ليا غبت عنه أسبوع تقل شهريني
ابن جديع اللي على الخط مبناه = عمارةٍ بيضلء على شارعيني
عتيق جعل الموت يا منيف ينساه = قرنين والا كلنا ميتيني
الوفي الكامل بدينه ودنياه = حاز الجميل وحصل الطولتيني
هداج ما عمر الرياجيل تدهاه = تضرب به الأمثال طول السنيني
عدن وروده ما تهاوش على ماه = تفوح أنا بيعه وجمه رصيني
مثلك إليا وصفت وأنته حلاياه = ماني مجامل يا عتيق الحنيني
عندي وكلٍ له مع الناس مشهاه = ولا قول ما كل العرب طيبيني
الطيب سندا والأجاويد ترقاه = الله يعين بعونه المستحيني
احدٍ خذا طيبه من أفعال يمناه = واحد ورث طيبه من الوالديني
واحدٍ مهف مقيط بالبير ورشاه = ما فيه لا دنيا ولا فيه ديني
لو عاش عمر شعيب بقعاء تعشاه = لا ناقصٍ زايد ولا زاد شيني
خطو البليد اللي قناته محناه = ضاري على الصده بقلبٍ متيني
ما هو عتيق اللي بشوشٍ لمن جاه = ذباح نابية الفقار السميني
ذباح نابية الفقار المحلاه = اللي شحمها صايرٍ طابقيني
للطيب شاره واضحه بين حجاه = رمز الوفاء ماجود فوق الجبيني
له مجلسٍ كلٍ يزوره وينصاه = عز الله انه مدهل الغانميني
ذولي على موعد وذولي مفاجاه = ماقول قول الناس شوفي بعيني
ستر البلد مثله وواجد مزاياه = لا أشك أبقصرها على كلمتيني
والله ما ظني تسوى سواياه = وهداج لو شان الدهر ما يشيني
ما قلتها بالشيخ قصدي هداياه = لا والذي تسجد له الساجديني
لا شك أحبه حب من جد وادراه = واجيه وان ما جيت يمه يجيني
لعل عدوانه من الناس تفداه = يفدونه الحساد والحاسديني
اللي من أقصى الناس واللي من دناياه = ناسٍ عداوتهم عداوة بطيني
دايم مجالسهم مجالس مواواه = على شمات الناس متوالفيني
هذا وأنا ما خص ناسٍ مسماه = اضرب مثل والناس متخالفيني
كلٍ على كيفه يوجه مطاياه = والعرف ما يعرض على العارفيني
وصلاة ربي بأول القول وأتلاه = صلوا على المختار يالسامعيني