اهلا هلا باللي يسوق التعابير
راع الحمية والكرم والشكاله
يامكرم العاني وريف الخطاطير
وبيتن رفيعن منزله من رجاله
وحييت ياعادل ولامنك تقصير
والرجل تعرف قيمته بعتداله
يابن نهار انته عن المجتمع غير
منزلك مثل سهيل نجمه إحاله
واكبر دليل انك صتيمه وبك خير
رجلن تميز منطقه وبقباله
ولاهي غريبه من سليل المناعير
اعيال عون اهل الوفاء والبساله
يامرسل اللي يتعبن المداوير
ولبستني تاج الفخر بالجزاله
اما كلامك في وصوف الخواوير
قولك صحيح ولايبيله اكماله
ايوا لله اغليهن غلا الصلب لمطير
ولا غلا سعدون شوفة عياله
رغم الجفاف اللي لياله معاسير
خلت مراتع نجد حمراً إسهاله
يبس الشجر ماباقي الا العثامير
والله مالوم اللي زهد في حلاله
راحت سيولتنا مكعب وشعٍير
وان زاد شيً من نصيب العماله
ولا حداً بذاخر عن حلاله مذاخير
لويدفع الميه بكيس انخاله
وعند الولي حل الكرب والتياسير
قرب طلوع السهيل ماهي طواله
يالله بنواً من وسومً مباكير
ينشي من القبله ثقيلن اخياله
ايسوقه الغربي شعوف ومعاصير
في دبرة المعبود جلا جلاله
لين يتوشع نجد قبل الحمارير
يبرق جنوبيه ويبرق شماله
يركد طخاف المزن ونصوبه تحير
رفاق دفاقن مخيف ثقاله
بخلال ساعه والشغايا محادير
على جبال المختلف والغزاله
والصبح تنشر بالبثوث التصاوير
من حد الاردن لين تاصل صلاله
تاخذ اسبوع وكل ديره بها خير
كلن يبا المطلاع لو هو لحاله
يفرحبها الوبال مع راعي الطير
وراع النعيم اللي ضعيفً حواله
عقب ارهقه غلو العلف والمخاسير
بيع خرافينه وبيع ارخاله
ولاباقي عنده يغير القراقير
الزين باعه والمدعل بقاله
#غازي مغيران الزغيبي