الشعر مغزا والقصايد جزالي = في ملتقى ربع الوجيه العفيفه
مير اسمحيلي ياظبي الغزالي = ماللمنيف الا الجبال المنيفه
ماجيتكم من نازح البين جالي =ولاجيت اغني باللحون الطريفه
شاعر يقدر طيبين الرجالي = قدره رفيع ويكسر العظم سيفه
وربعي جهينه تاج راس المعالي = وعزومهم وقت المواجه عنيفه
افخربهم لا حل وقت المجالي = ياحضرة الجمع الكريم ولفيفه
قومن لهم تاريخ ياهملالي = ناصع بياضه يابياض الصحيفه
اصدق مكارم من صدوق الخيالي = وامضى من حدود السيوف الرهيفه
فزعاتنا ترجح بوزن الجبالي = مانرتجي مد اليدين الضعيفه
ومن ضافنا نذبحله من الحلالي = والضيف يلقى الجود من مستضيفه
وصدورنا مايضيق فيها المجالي = لاضاق مرذول الاوادم بضيفه
عاداتنا نوفي بكل الحوالي = وابصارنا بالنور ماهي كفيفه
ما نلتفت في قوم قيلأ وقالي = ونصد عن راع العلوم الخفيفه
ولا لنا معهم جواب وسوالي = انشوم عن هرج الضعوف ونعيفه
احرار من ميلادنا ولانزالي = والحر ماياقع على جرم جيفه
وان عودت للفعل والانفعالي =انروض اسود الليال المخيفه
ايماننا ماتصطفق بالشمالي = ونرعى الخطر وسط الديار المريفه
خلي يابنت مشوربين العيالي = هرجة دحر جيش الشريف وشريفه
حنا جهينه بالوغا مانبالي = حنا مقابيس الحروب الكليفه
ابن غنيم بما مضى ويش قالي = لبن سعود ولبن جبر وخليفه
اطلق مساجين السجون التوالي = وبوامر الحكام مابه نكيفه