سر يا قلم وأكتب على البيض معناك= بوصيك عبد الله على الخير يمناك
صل الفروض الخمس مرضى لمولاك= يدخلك جنات بها حور وقصور
بالك تعاصي ابوك لاقال طيعه= وأمك ترى الجنة تحتها وسيعه
أمر الرسول الهاشمي فالشريعه= واللي يخالف مات مدحور مدحور
عبد الله اذبح لضيوف البكارا= واملا دلالك زين هيل وبهارا
وأكثر تراحيبك وشب الوجارا= والعود الأزرق بخر والطيب بزهور
بالك يشوف الجار منك العنادي= خلك قرين الطيب راعي ودادي
لابد من يوم يجيب البعادي= وإن لك مع جارك معزات وسرور
وعيال عمك في جميع المواقيف =خلك معاهم راع شد ومحاريف
كمل لزومك خل عنك التساويف =حيفاه للي فالمواجيب مقصور
بنت الردي لو ضللها المزن ورشاش =وإن القمر من زينها بايت اغباش
عن دارها ياخوك لابد تنحاش= لا تناسب الآَ شيخ فالعز منعور
يطلع ولدك من الرجال النشاما= يكرم سبالك رجل بالطيب راما
تفرح ليا شفته به العز زاما= يروي ضماك ويشفي اجراح وكسور
دنيا عجيبه كل يوم بلباسي= شابت كبار الروس ويشيب راسي
أحذر تغرك بين شوف وعماسي =ما دامت الدنيا على حال مخبور
ياذيب ياسرحان صاحب ذيابه = صاحب عزيز النفس مالي ثيابه
من صاحب العدوان مردود جابه= عده من العدوان والبيت معمور
واعرف ترى الأيام تظهر صديقك= صديقك اللي فالمواقف رفيقك
ولاَالردي فاللين شادى شقيقك= واليا نصاه الواجب انحاش مذعور
هرج الفتى ياخوي ميزان عقله= والصمت خير الامر و الحق جله
واحذر لسانك كم عزيز يذله= واللي تقوله يافتى الجود مسطور
ياخوك ذقنا بعد الامرار حالي= واعرف ترى الدنيا سهول وجبالي
هذا جواب القلب منظوم بالي= ياخوك منهوا يتبع الحق ماجور
وختامها صلوا على اللي ودادي =صفوة بني هاشم رفيع العمادي
اللي بعثه الله بالنور هاديابه =أعداد ما شمس الضحى توقد النور