يالله تجزي حامس البن بالحور =يا حامس الأشقر على البيض نجزيك
وملقمه دله بعد دق بنجور= ومبهره بالهيل مجدك بياديك
لا تشتري بنك بعد حمس مصرور= ما يعرف الهندي حموس(ن) ترويك
أقرب من المحماس ولاانته بمضرور= بن اليمن حمسه عبير(ن) يشافيك
والنجر نجر الشام بالخير مذكور= صوته طرب ضيفك وجارك وعانيك
يامزهب الدله ليا اقبلت بسرور= رحب وهلي والمناعير تطريك
واذبح من الكوم النقيات جابور= لا تشاور الضيفان لضيف يجفيك
كل على يسره يمدك بمنظور= وانته على يسرك تفسر معانيك
أقلط على الكرمات مانته بمنكور= يا قالط الكرمه مقلط شراويك
ما قصدك العيشه على العيش ناظور= قصدك هل الطالات تلفي وتلفيك
واليا لقيت اللي كسى وجهه النور= أوصيك تنصتله علومه تقديك
تسمع تجارب في قسى الوقت ويسور= تسمع من الماضي علوم(ن) تسليك
واللي صغير السن ماهو بمحقور= أجلس معه لو كان سولف بماضيك
رب الصغير أعلم وبالعلم محبور= عليه نور العلم يزهى ويزهيك
واحرص على صحبة هل الخير مشكور= يا مجالس الطيب من الطيب يحذيك
واحرص على مفارق هل الغي والبور= واعرف مجالس نافخ الكير يذيك
واللي عزيز النفس بالذيب مذكور =واللي طرا الغيبه يكوكي كما الديك
واللي لبس ثوبه من الجنب منتور= ود العرب مثله عن الخير ناهيك
طاري من الهاجوس منقوش فسطور= يللي حمست البن من قلبي اسقيك
واعداد ما يزرع من اشجار وزهور= صلي على المختار ربي يعافيك