يابنت انا ماني على ما تخبرين=تغيرت فيني أمورن عديده
يابنت لو عن بعض ما بيّ تدرين=ما كان جيتي والمسافه ... بعيده
يابنت لو مخلوق قلبي من الطين=حكم الزمن سوّاه مثل الحديده
من قسوة الايام ما عاد بي لين=حتى كلام الحب ما اصبحت أجيده
رحتي و قلتي غيبتي يوم يومين=وطال الغياب وغيرّ القلب جيده
رحتي وقلبي بالهوى لك بساتين=جيتي والى ان القلب يابس جريده
لا تعجبين من الجفا لا تونّين=زرع الغياب المر واجني حصيده!!!
شفتي هذاك الود كبر الضلاعين ؟؟=زلزال بُعدك فتتّه يا بعيده
عطشت وأسقاني زماني من البين=حتى ارتوت فيني مشاعر بليده
ما صرت مهتمْ لو تجين او تروحين=قديمكم عفته وما ابغى جديده
وان كان قلتي ش السبب؟ قلتلك دين=واجب سداده لأجل روحاً فقيده
واذا نسيتي جرّبي لا تناسين=واتذكري ذيك العهود الأكيده
واذا نسيتي كم ذرفنا من العين=اتذكري كم همت فيك بنشيده
واذا نسيتي كم من الناس غالين=يوم اعذلوني فيك صغت القصيده
هجوتهم بالحرف هجو المعادين=وأرضيت من ضلّت بقلبي وحيده
واذا نسيتي يوم كنتي تنادين=اسمي والبّي لك بيا سيد سيده
اتذكري إنّا رسمنا على الطين=ليلى وقيس ويدّها تحضن اِيده؟؟
واذا نسيتي ارجعي خلفك سنين=تلقين بعضي ينتظر فكّ قيده
واذا نسيتي كل هذا و .. ذلحين=جيتي تبين الدم يرجع وريده
جوابي ( آسف ) من هنا لحدّ برلين=ومن قاصي أمريكا لمينا الحديده