محاورة بين الذيب وراعي الغنم ارجو ان تنال رضاكم

الذيب
انا ساري ضلام الليل واهل الماشية ضمان=وكم صاحوا وكم عانوا وكم تعبوا من اسبابي
وياما اكلت من لحم وشحم واخذت للورعان=ويبقى في مفارسنا عشا للنسر وغرابي
راعي الغنم
الا ياذيب ياساري تبي مرح المعز والضان= وتلحقها بعيد الدار والا جت فالاقرابي
تعشى من حلال الضعف واذبح غالي الخرفان= وخذ ماطا ب لك من مال واهله عنه غيابي
الذيب
ياراع الضان توصيني وانا في مهنتي ديقان = وانا صاحي لنفسي مااقترب من كل مزرابي
وانا خابر وداري واعرف الطيب من الهزلان = وياما حانت الفرصة تراني شامخِ نابي
راعي الغنم
تبعد عن مفالينا تراي ا رعيك بالاعيان =ولااشوفك تمر مراحنا اللي جنب الاطنابي
وانا جالس حدا المرحان واسرح ساقة الرعيان=ولاشفتك رميتك رمية اللي لارمى صابي
الذيب
انا صاحي لنفسي واعرف النايم من السهران =ولا اقرب من حلالِ شفت لي من دونه انشابي
ولا منك غفلت اجيك وانهب وازبن الضلعان=وانا من عادتي ما اغير لين يزين مضرابي
راعي الغنم
انا عارفك ياسرحان لك راس الجبل مزبان= لكني ذيب مثلك منزلي في راس مرقابي
انا باخذك بالجرة يلين تخش فالغيران=وابااجيب الحطب واشب نارِ تلهب الهابي
الذيب
بعد مابان لي علمك عرفت انك من الظفران = وسجلني من اصحابك وابا اعدك من احبابي
ونجعلها صداقة بيننا طول الدهر صدقان = واظن الذيب مهما صار مايسطي على الذيبي
راعي الغنم
تحايلني وتخدعني تحسب اني من البلهان= عداوتنا قديمة مانصير احباب واصحابي
ولا اصدق علومِ ماخبرنا جالها برهان = يخاف الحبل حي ماسلم من قرصة الدابي