عن العوج واللي يحب العواجه
يكفيك عن سرد السوالف غيابي
البارحه واليوم هرج وعجاجه
واصبح على روس النوازي ضبابي
مرحوم ياللي في نهار المواجه
مايعطي العدوان مقرن علابي
جاني بعتمة ليل يوضي سراجه
ينشد وعلمته دواعي عتابي
ولي قال وصل العلم عنق الزجاجه
وقفى حزين وجرح وقتي سطابي
بعده ماليه بالمساكين حاجه
يكفي طموح النفس حضرة جنابي
عدو جدك لو ضحك لك حجاجه
لابد مايرميك رمية صوابي
ترا كلام الترمذي يابن ماجه
صحيح لو مافيه نزل كتابي
صدقت ماصدقت ماهي لجاجه
القاف ياللي تفهم العلم شابي