السلام عليكم ورحمة الله وبركاته
شاعر واعبر عن شعوري بالابيات
فيما طرأ للناس تال الزماني
قصيدتي سميتها واقع الذات
الله يفرجّها على من يعاني
صغت العذر بالود وأجمل تحيات
مخصصه لاهل القروبات داني
اللي يخوضوا في جميع المجالات
والغايبة تلقى لها ترجماني
واقع وصورتّه على شكل لوحات
جسدت بلإبداع رمز المعاني
الجمع فيها جمع طول الغيابات
محفل بدون حضور لله شاني
اما تشوف حروف او تسمع اصوات
وكلٍ حسب فكره بيلقى مكاني
ولاشك ماكل القروبات غابات
ولا كلها تقرِي باهلها السماني
البعض منها للفوائد منصات
والبعض منها للسفاهة مواني
والعاقل اللي بالفكر له خيارات
إن ماعجبه هذا يبدل بثاني
مرتاح باله عن دروب المتاهات
ولا ينحسب بين الخلايق اناني
،،،