عيني وشبك ماهتنيتي فالمباتي=كل ماجيت أرجهن جالك دعيه
والله إن الصبر غلق والسكاتي=بيني دعواك مابيها خفيه
هو أنا مسهرك لأجل المترفاتي=او حرمتك نوم لأجل العسوجيه
عيني اللي عرضتني للشماتي=وش جرالك وش بلاك إمعانديه
عيني اللي قربتني للماتي=ماعرفت العين وش جاها عليه
ليت وإنك تاركتني في سباتي=ماوضعتيني لنظراتك ضحيه
بس هاتي قصتك ياعين هاتي=الخوي ياعين مايخدع خويه
قالت انته داريٍ باللي نحاتي=وانت داري في فصول المسرحيه
لاتغيبا معي واخذر ياغناتي=والله إني ماأظلم النفس البريه
شفت واللي شفت بالواقع ثباتي=يلزم اللي في ذره من حميه
شف بنات أهل العراق ميتماتي=يحرقون كبودهم حرق الشويه
الحقيقه جتك دون مجاملاتي=ماهرجنا معك غير بحسن نيه
قلت انا ضمي مع الحزمه عصاتي=عسكري لو ماعرفت العسكريه
لو فزعت بخنجري وإلاقناتي=كيف اطول الطايرات المروحيه
سببت عيني علي ملاحظاتي=يالله استر من الرجال الداخليه
ماتخلص غير لاشافو ثباتي=لأجل من الزلفي عناوين الهويه
السوابق في سجلي خالياتي=بس إسمي والعيال بلا خطيه
لاتصعب شي يترك للولاتي=كفنا بكفوفهم والنار حيّه
الله إنه يجمع قلوبن شتاتي=تفزع السنه بصف الجعفريه
غربها يفزع لسكان الفراتي=وشرقها كله حرارٍٍٍ صيرميه
التفرق فقر والجمعه غناتي=نصرنا جمع القلوب اليعربيه
العدو لو هو تسلح طايراتي=النصر حليف وحدتنا القويه
أبو متعب مايبي لحدن وصاتي=فيصلٍ فيه نخوه فيصليه
راسين مثل الجبال الراسياتي=مايهزك ريح يابو الغايريه
قاسين واقساء من جبال السراتي=العدو ماله بقلبه مرحميه
ابن من احفا ظهور المسرجاتي=لين ساد وجاد في حكم الرعيه
من معزي به ثلاث مواصفاتي=الشجاعه والكرم والقابليه
يجذبونه شمر أهل الطايلاتي=والعروق تورده للوايليه
مير ياعيني تغطي فالعباتي=واستريحي من عناك بوسط فيه
ماعليك من الذياب القانباتي=وكلي خالقك ثم اهل الحميه