يابوسعد علمك وصلني مع دباس = انك على ماقيل رجال محسوب
ماهي غريبة حيثكم ناس من ناس = تاريخهم كن الذهب منه مصبوب
ذكرتني وقت مضى راح يادباس = سوالف حلوة على وجار مشبوب
متجمعين كنهم جوهر الماس = مافيهم اللي تضربة باي عذروب
عدوهم دايم مرده للأفلاس = يرجع كما ذيب على الخشم مضروب
وان كان تنشد يالبناخي فلاباس = مرتاح لاطالب ولاني بمطلوب
اليا بغت رجلي بعيدات الأرماس = ماردها وارقى على كل مرقوب
ياماسهرت الشعر سجه وهوجاس = متقمصن شخصية انسان منكوب
اقطف واقدم له من الفكر بأحساس = كني محامي والقضا منه مطلوب
صرت اكتب المعنى بدقة وبقياس = مثل الجواهر مابها بيت مشطوب
مالي دخل لكن تلولست لولاس = تقدر تقول انه مقدر ومكتوب
شفت الخيال اللي تسولف به الناس = يامارسمنا في مظلاته قلوب
ياما عزفنا له ربابة ومرواس = قلب العنا يلعب هجيني ومسحوب
واختامها مني تحية بقرطاس = والحق عليا قبل لااحج واتوب

يامرحبا ترحيبة ترفع الراس = بدباس والخط الذي معه مجيوب
ترحيبة ماهي تماليق هلاس = بالصاحب الي ينظم الشعر باسلوب
حيه على ماقد نسنس الفجر نسناس = وحي البيوت اللي كما صافي الذوب
ابيات ابوسامي بناها على ساس = واختارها فكره حشا مابها عيوب
من هيض جاشه سطر بطرس كراس = اخذ على نظم الطواريق ملعوب
اخذ على كيفة القاف مرواس = يرمز على اللي داخل القلب محجوب
وانا اعرفه لاصار للحبل مساس = ربعه لكان الكون حاضرهم ينوب
لاجا نهار فيه الأرياق يباس = اهل المليحا دارهم دوم مهيوب
من دون حمر كنها حمر الأطعاس = كم شيخ قوم كان مامات مبسوب
وغانم من اهل العرف فاهم وحساس = ياقف ليا جاله مع الربع ماجوب
لايحسب النشده طريقة تجساس = على الجماعة ماني مفتح دروب
انشد عن اهل الطيب واكب الأنجاس = وافخر لياصارو هل الراية حروب
لايدخله شكة ولايدخله ياس = كان الربابه فوقه القوس مجذوب
لليل مدماس وللبحر غطاس = وللسيف سياف وللشعر منصوب
وللخيل خيالا على قب الأفراس = لاصار حبلا بين الأجناب مكروب
وللبرق خيالا وللبر عساس = وللقوم سبارا وللفعل وبالفعل منسوب
والشعر فيه اشكال وانواع واجناس = وكلن على قده من الخام له ثوب
احد يجي شعره تقل سم نداس = واحدن يجي شعره مكمل ومنتوب
واحد يجي شعره تقل حد الأمواس = لاصار بالميدان غالب ومغلوب
واحد قصيده مثل من يطبخ الفاس = لاكاسبا حسنة ولاقاضيا نوب
واحد كسب بالعرف والشعر نوماس = مثل العسل والسمن بالكاس مسكوب
ولاهو محرم في حديث ابن عباس = إلا القبيح وطيب الشعر مرغوب
والعذر منا كان ميزانا هاس = حنا ترا بالشعر يادوب يادوب