قصيدة الشاعر الراحل. فراج بن
فواز الهويملي رحمه الله.
بتاريخ 27/ 3 / 1423

1- لو هي تجي لهل الهواء بالمناوي
.. كلٍ ملا بيته من العرض للطول

2- لكنها صعبه وطنها سناوي
ما تاتي الا كود بالفعل والقول

3- لاتقول انا فيها مدايه رهاوي
.. لابد ما انته عن امانيك معزول

4- لو نظرتك فيها تشد الهقاوي
.. لا بد ما يأتيك بالعلم مرسول

5- يا العبد جنب عن صدوف الاهاوي
.. لا تنزلق قدامها زلقة القول

6- لو دربها قدم العيون متساوي
.. ايام والا ايام ويصير مشلول

7- لو اشرقت دنياك ويش انت ناوي
.. تراك عن بعض المقالات مسؤول

8- ترى الدهر لا شط ما هو ابياوي
.. حول بسيفه و احتمى شرد الشول

9- ما اشكل عليه اللي يجيد العزاوي
إليا بغى يمشي مشا به على طول

10- نصيحةٍ ما ابغى عليها جزاوي
توخذ نصيحه لو على دربها نزول

وطلب مني مجاراته رحمه الله
وجاريتها بهذه الابيات:

1- شرحت يا فراج دنيا البلاوي
.. وعبرت عن دنيا الشقى شي معقول

2- عبرت بالتجريب ما احتجت راوي
.. مصدر وعلمك يا ابيض الوجه مقبول

3- تقول دنيانا كثيرة ملاوي
.. فيها تمر ايام وشهور وفصول

4- بقفايها تكوي وتحم المكاوي
.. وتضرب بخدٍ عافته حد مصقول

5- ولا يجيبها كثر الحكى والعزاوي
.. ما تنتناوى يا ابيض الوجه وتهول

6- كم حولت من نايفات العلاوي
.. وكم فرقت باحداثها جمع ونزول

7- وكم حاكمٍ فيها عزيزٍ غناوي
.. امسى بحكم وطلعة الشمس مفصول

8- ويجّر عقب العز مثل الرغاوي
.. ما كن غنّت له مزامير وطبول

9- والعبد فيها بين حسن ومساوي
.. يمشي على الاقدار والموت مجهول

10- والرابح اللي ممسكه بالعراوي
.. ومطيع رب العرش والرزق مكفول

مع تحيات / 28 / 3 /1423
برق المزون