مرزوق مبشر المزيني من الاصدقاء القليلين وبيني وبينه
مساجلات كثيره الجاء له لشرح شعوري وهو شديد النباهه
يدرك ماقصد ويجيب
قلت له ذات مرة مايلي:.
الكلام يقال عند مناسباته =والعلوم تجاب في حزة طلبها
والرجل يسعد ويشقى في حياته= والمشاكل كل عاقل يجتنبها
الرجل ينبيك هرجه عن صفاته = والحقيقيه تقنع اللي ما طلبها
ما نحسّب للكلام وشايعاته = والمحابل شرها للي نصبها
من تعرض سيرنا نلجم لهاته = ومن يشب النار نرميه بلهبها
ندرس اوصاف الرجل ومواصفاته = نقتدي في سيرته والانعقبها
ياوسيع المعرفة ماجبت هاته = ماتجيب إلا لجزيله مارجبها
عندك النطق الجزيل وطيباته = والمعاني ماتجيب إلا ذهبها
الاسم مرزوق مرزوق بذاته = من فعول طيبات ومن أدبها
وبعده مبشر والبشرى من سماته = يشتري كل النوادر من جلبها
ياسديد الراي ودي بالتفاته = للعلوم اللي تسلي من قضبها
جدد الموضوع وأهمل سابقاته = كل نار طافيه غيب حطبها
لو بنات أفكار مخي حاضراته = من شهور ماضية كان انتدبها
لكن الموقع عليه مخلفاته = وأثرهن راحن مع اللي راح لأبها
قمت أحس الوضع وألمم شتاته = والوعور اللي تتعب مارتكبها
يالفهيم اللي على الحكمه ثباته = لاتحاسب من حساباته حسبها
والعمى متجود في راس شاته = مالنا بالطاولة واللي قلبها
والثمر مازال باقي في نباته = وانخله مستور ماحرك رطبها
جاك علمي وأنت تفهم خافياته = تفهم القصة وتفهم وشسببها
فرد مرزوق بما يلي :
ياسلام الله عليكم وبركاته = كلمة تظفي على السامع هدبها
مختصرها والكلام وموجزاته = وكل كلمة حسب فهم اللي كتبها
وأبو خالد يوم عبر من جراته = ومن وفاه لسيرة الماضي طلبها
وارداته حطهن مع صادراته = باختياره جمع العقل وقصبها
يوم حسب عاد طبع مذكراته = وعمر الفله وقال اختر كنبها
بالبيوت اللي بها صاغ كلماته = ماص مفراس البيوت إذا كتبها
القلم ترعف من أفكاره دواته = والمعاني لو تمادى ماسلبها
ولا تكل من الجزال محاولاته = وخبرته وأفكار عقله ماحجبها
من سلوبه لاصدقائه مجاملاته = والنفوس البوس مايدرى غضبها
لاصدقائه بعملته ومعاملاته = سيرة اللي لاتركتها ولا قضبها
والصراحة والثقة من راسياته = والحماقة لو ركبها ماشعبها
حسب فهمي للهدف وملابساته = يوم مس أبطانها مدري حقبها
ساقها سوق المعيد بمبهماته = ساقها مدري مع المنحى سحبها
صاغها بمخططه ومعادلاته = وقال جبها وأنت واحد من جنبها
والسفينه مبحره في صافناته = وترجمة سبة زعلها مع طربها
وحملها دفعت على الشاطئ زكاته = ودسرها ثبت على الشاطئ خشبها
قادها بحبلها وأرسى حصاته = طاوعت مدري على الجود غصبها
أعتبرها معجزة من معجزاته = كيف يذبح ولا قطع عصبها
والنعت توضيح علم بمفرداته = والعمى بيت القصيده ياحدبها
العمى خل البصير وعابراته = وكابتن الحاره يدرب منتخبها
خذ عبارة يالحكيم بواجباته = إن خلت مستور ماصفى حسبها
وأبو خالد بالرموز مساجلاته = جاوب الأعراب في لهجة عربها
وإبتديت وطالب التوضيح جاته = جملة مضمونها يفتل شنبها
شفت مدري شاف في شاشة قناته = والعرب تجهل سببها مع نسبها
والخبر تحت الثرى دفنت نواته = شافها مدري سمع لكن نكبها
واحد شال الذبيحه في عباته = راسها مخفيه ومبين ذنبها
اللهم لا إنتقاد ولا شماته = لعبة البيه ولا افلح من لاعبها
وكم مصلي ماقرا الحمد بصلاته = وكل نفس تسير حين الله وهبها