خـالـد بــن عـبـيـد بن معتوق الأحـمــدي

هذا شهرٍ للعباده عندي افهـذي شهـاده=فيه فرصه للتّسامح والوفي يعفـي خويّـه
ادعي الله فالسّجود اللي سجدّته له عبـاده=يستر المولى عليك ويستر المولى عليّـه

مــشــعـــل الـمــعــبــدي

خالد بن عبيد يونس نار في داخل فـؤاده=والحقيقه ضيقته مانـي سببهـا فالبريـّه
أنت ماجبت الجديد ولا تسلّمت القيـاده=لاشداد ولارسن حتـى نوكّلك الرعيـّه

خـالـد بــن عـبـيـد بن معتوق الأحـمــدي

مايضيق الصّدر دام الصّقر مايخسر مراده=مير يامشعل صفحنا والعفو من طيب نيّـه
مانلوم الرّجـل كانـه ماتوفّـق باجتهـاده=وانت ماتكّذب عيونك سقتها سوق المطيّه

مــشــعـــل الـمــعــبــدي

أنت علمك ماعليها ثبوت ياعين الجـراده=غير تصفق باليدين العوج وتقول الخطيّه
مانلوم الي تورّط وانفشـل عنـد الافـاده=يونس بطعنات في كبده سـوات النافعيـّه

خـالـد بــن عـبـيـد بن معتوق الأحـمــدي

انت ياللي لك عيونٍ بالظّهر فال القـراده=تشبه الخفّاش نوب ونوب داب ونوب حيّه
لو تشوف الحقّ بيّن تنكر ومكرك زيّـاده=كيف هذا وانت تحسب من حموله صيرميّه

مــشــعـــل الـمــعــبــدي

أبرق الجنحان ماهو صقر يعجب في هداده=ليت يصحى اللي رقد من عهد ليلى العامريّه
مانغيّر فالعوايد وانت لك دوره وعاده=لايعدّيك الزّعل وتزلّ رجلك في نحيّه

خالد بن عبيد بن معتوق الأحمدي

الصّقر لعلن هداده مانت كاسب في جهاده=حالتك يرثى لها منته بحافظ للوصيّه
ذيك فيك وطبعك اللي ماخذٍ فيه الرّياده=وابرق الجنحان مخلابه يورّدك المنيّه