الله من قلب كثيره طواريه = شيٍ قديم اوشي توه بدايه
همه وهوجاسه تحلل مداليه = امسى معه واصبح تقول ابضبابه
ياخذ معه ساعه وساعه يوديه = يفتح بوسط القلب سبعين بابه
ماينوصف له وصف وشلون احليه = كنه على جمر سريع التهابه
ودي عن اللي فات واقفت لياليه = انساه نسيان تطاول اغيابه
واضرب عليه بخط احمر واخليه = يمحا وتمحى ذكريات الكتابه

الذيب درهم لين بادت سماريه = وعندي خبر رزق الذيابه نهابه
حيل الله اقوى قرب الزير راعيه = وفتيلها منها سريع اقترابه
وحي الجواب اللي كما النور غاشيه = وحي الرسول اللي عنابه وجابه
جواب ناقيه السليمي ومهديه = مني عدد قطر السما مرحبابه
وقارنت بين امصيب علمه ومخطيه = وانا محيط بكل فنه وادابه
حط الهدف واخفا مكيدة معانيه = باعه طويل ومن مقاديم لابه
عسل كلامه والهدف فيه مخفيه = ومعناه عني بالكواكب رقا به
وخفت البطا يجلب عليه مشاريه = واجهل عباد الله سريع الأجابه
وفهمت من علم احمر العين تاليه = انه محمل شرهته سبع غابه
واشر على علم من العام مطنيه = واخير مابه يالفتى ترك مابه
خله يروح وكل ماجاه فاديه = وخذ الحذر من بعدها والحزابه
وكان احمر العينين يرفع عزاويه = ابشر بسيف دونكم بالنيابه
وان كان ساع الخير كلت مساعيه = الله خلقنا للمصيح اجلابه
وانته شرهت اجريس كفك ايحنيه = واجريس عن كفيه قصر خضابه
اخوك اخو سره عسى الله يكافيه = انته ماتدري فيه والله درابه
وانا بحلت بحي باليه باريه = اهل القلوب السود والسن صحابه
واللي مع العميان يغمض بعينيه = والا ترى الحسنا وراها طلابه
وترى رفيق اليوم كشفت مغاطيه = ويضنه الجاهل على ماهقا به
ماهو صديق ولا عدو تعاديه = شرق اوشمال اوشام كل حكابه
والدور دار اوجار ماكثر بلاويه = يدمر العامر وعمر خرابه
اذيابته جوعا شباع حصانيه = والعبد باع بسيده واشترابه
وحوت البحر ياكل ضعيفه ويبكيه = وعجبت من عصفور حجرف ودابه