( ساعة الإجابه في يوم الجمعه )
عصريّة الجُمعه إلين الغُروب
في حِروه لساعه بعِلم العليم
أنظُم قصيده ولافيها عيوب
فيها ابتهِل واطلب إجابة كريم
ياربّنا وانت غفّار الذّنوب
أكرم كريم إنعَرف واحلم حليم
اجعل ذنوبي من إحسانك تذوب
واضفي بسِترك عليّه ياعليم
يامصرّف الكون علّام الغيوب
يارَبّ جبريل والعرش العظيم
راجي بلُطفك لقلّبت القلوب
ثبّت فؤادي على الدّيِن السّليم
سُبحانك وبامرك تِهبّ الهبوب
يسّر على اللي من همومه كظيم
واللي سمع دعوتي فيها امحسوب
تهديه ممشى السّراط المستقيم
ومنك الفرج لااقفلَت كُلّ الدّروب
أُرزُق ولد للي مطوّل عقيم
وارزُق بالاموال خالين الجيوب
واشفي مرض كُل من جِسمه سقيم
واقبل دُعا التّوبه لمُذنب يتوب
والطُف بحال الضّعيّف واليتيم
واحمي بلدنا من احداث الكُروب
واجعل ملِكنا وشعبه في نعيم
الشّاعر/ خالد بن عبيد بن معتوق الأحمدي