السلام عليكم


قصيدة بعنوان : ياعاقل اسمع

بقلم / فواز بن محسن الزويهري الحربي

〰〰〰〰〰〰〰〰

لله في خلقه سبايب وتقدير
ومن لا يعرف الله خابت رجاياه

ومد الوفي لو قالوا الناس تبذير
قلت الكرم فالنفس معنى لفحواه

ولو بعت دهن العود ولو تنفخ الكير
الناس ما ترضى على حال تبغاه

قالوا قليل : وقلت فالقله الخير
هذا البحر وافر ولا ينشرب ماه

والطيب في قطره مع الناس تعطير
والسم نطفه منه تقتل بلاياه

وياعاقل اسمع والمعاني بتعبير
ومن لا عرف مخرج لمداخله اشناه

لا تحقر المعروف لو كان قطمير
ولا تستهين برجل تجهل خفاياه

ومن غشه المظهر تعثر على السير
ومن دور الجوهر وصل قمة مناه

ومن لا يحسب كلمته قبل لا تصير
على فميّ الناس لا يشتكي داه

وأحذر تصير شراع يبحربك الغير
في بحر ماله قاع قاصي في مرساه

بعض العرب أقرب مثل يوصفه زير
الصوت عالي وأجوف الجوف برياه

وبعض العرب حرن على ساير الطير
والصقر ما يذكر من البوم خاواه

هذا كلام الصدق من شاعر ن غير
يسبك ذهب والحرف يعجبك فبناه

➖➖➖➖➖➖➖➖