يامرحبا ترحيبتن تشـرح البـال=بالصاحب اللي له معزه وتقديـر
عـداد ماهلـت هماليـل همـال= ترحيبن احلى من حليب المغاتير
ومن بعدها نبدى بترتيب الأمثـال= ونجيب صرفن مثل نقد الدنانيـر
نختار زينات المعانـي والأقـوال=وحقن علي اصخر القاف تصخير
واحط لي رايه على راس ماطال=واقـول والله ماتجـوز المعاذيـر
لازم نبين فعـل وافيـن الأفعـال=اللي لامنه ثار عـج ومعاصيـر
ياقف بميقافن يعدي عـن الجـال= ويضحك حجاجه لا لفوه المسايير
والله ماقولـه منافـق ومحـتـال= ياطيب السمعـه وواف الأشابيـر
منصور ابن صالح من الجد للخال=عريب جد ولايحسب المخاسيـر
عديت كلمة حق والحـق ينقـال=والمعذر اليا حصل فيـه تقصيـر

يالله يامنـزل تبـارك والانفـال=على النبّي ويذكر الناس تذكيـر
ياخالقن هالكون في ستت اليـال=يارازق الانسان يارازق الطيـر
ماتفيدنا الشهرة ولا ينفـع المـال=ويحاسب الانسان في كل تقصيـر
والناس عريانه ولا يوجد انعـال=على اللذي مكتوب جايه طوابيـر
ياويل من ياخذ كتابـه بالشمـال=ماقدمه الا النار وبرد الزمهريـر
اللي يروح يمين حظه ترا عـال=قدامه الجنات خضـر ونواويـر
يارب ساعدنا على الحظ لامـال=يالله انا طالبـك ماريـد تأخيـر
الحمد لله جات الابيـات تنهـال=حي الكلام اللي يبشر تبـا شيـر
ياحمود لك تقدير لك عز وجـلال=تستاهلون الطيب يافاعل الخيـر
انته حفيد اللي بذكرة ولا زال=ياذبحين الحيل ياناحر بعير
ياما تمنا الضيف في تالي ليال=امن الكرم ياما تمنا المسيير
يامرحبا من قلب ماهوب تمثـال=اعداد مايطري على البال تفكيـر
عد الشجر ويا الحجر عد الارمال=واعداد حجاجـن تلبـي بتكبيـر
ياحمود يفدونك ترا كـل الانـذال=واسمح لنا لاصار فالهرج تقصير
اقدم الشكر على كـل الاحـوال=للمنتدى مخصوص فكرة وتصوير
يستاهلون المدح لاشـك لاجـدال=على العموم واصلـه للجماهيـر
ولكل غيداني على الراس والبال=نعمٍ بهم ينقـال تكريـر تكريـر