*عتيق ياجعلك عتيقن من النار*
*للتف ساق بساق يوم القيامه*
*حضوري الليله محبه ومقدار*
*وملبي الدعوه كفيت الملامه*
*دعاني محمد ولا عنه معذار*
*ابو تميم الله يرفع مقامه*
*الوافيه عندي لها تاج وشعار*
*بالشرق والا في سواحل تهامه*
*والناقصه وزعة قصيرين الانظار*
*ماني بها ملزوم ومع السلامه*
*الله خلقني حر من ضمن الاحرار*
*سمعت ياسلمان مدري سلامه*
*الشعر لشعار غايه ومضمار*
*وماكل من غناه حقق مرامه*
*شاعر على صوت المزامير والطار*
*يرقص ويومي في جناح العمامه*
*وان قيل يومك لاتوخر وتحتار*
*قامت تراقل بالمواقف عظامه*
*وشاعر ليا شانت وعمين الابصار*
*مفراص ماص ويلتفت في حزامه*
*فاصل وواصل في حديثات الاصدار*
*شرد عليهن للجزاله علامه*
*في حفل من تثني ورى عكش الاوبار*
*في يوم يشدا يوم حرب الرغامه*
*ابناء الزغيبي لامكر كل مكار*
*محزم ضفر ورجال طيب وزعامه*
*اهل البيوت اللي لها ضل وستار*
*وللضيف والجيران فيها كرامه*
*وقصيرهم محشوم من كل الاقطار*
*يزود مع زود الزمان احترامه*
*مامال غصن الورد من طيب الاثمار*
*صلو على المختار بازكى سلامه*