الناس يامروج لها ماانت منها
لاتقلب الصفحه تفاجا بالاخبار
منك يتعذر شامها مع يمنها
عندي ملخص للحقايق والاسرار
خذ علم من جاب العلوم وضمنها
لاتصير شماعه لحاسد ومكار
يضحك عليك حسينها مع حسنها
حذافة المقفين من خلف الاسوار
في كل وادي يوم ترعى ضعنها
لك مصلحه والا تبي تشعل النار
اكيد لك مدفوع مسبق ثمنها
ونسيت فيك اللي تقل راس شنكار
شوري لاترخي للخبيثه رسنها
ترميك في حقل المشاكل والاخطار
نصيحتي خذها ولاتصد عنها
بلاش جاتك في زمن غلو الاسعار
يامخرج الافلام نفسك شحنها
حب الظهور وحسد ناجح ومغوار
من يوم بين من رداها وهنها
ماصار لك عند المطاليق مقدار
واللي يطول مشلحه ويخبنها
ماني بجاهل فيه في كل الاقطار
يقول ليلى حبها واحتضنها
والصدق ماله عندها بالزمن كار
سوالفه هاذي بهاذي قرنها
هدوه لاينقل على المتن سنجار
عطوه فرصه لين يضبط لحنها
ثم اسمعو صوت المزامير والطار
اهل المهن معاد تترك مهنها
والسوق يقبل كل عمله ومنهار