عسى ربي يجملني وجمل*
*رجالن يستحقون الجماله*
*مقابيس الوغا سقم الاعادي*
*ليا ركب الرشا فوق المحاله*
*دعوني والعذر يصعب عليه*
*مايقبلني عذر في كل حاله*
*اللبي دعوة الداعي وقدر*
*رجال الطيب ورجال الشكاله*
*مثل زيدان لامنه دعاني*
*من الدار البعيده ينعناله*
*يشرفني حضوري حفل أقامه*
*بطيبه طاب راع الطيب فاله*
*سلام الله بعد ماجيت عاني*
*سلامن يعطي الفاهم دلاله*
*على قو الترابط بالقبيله*
*ودحر العنصريه والجهاله*
*يعم الحاضرين وكل غايب*
*جنوب الدار والا في شماله*
*واخص اللي لهم بالطيب مقسم*
*قناديل الدجا واهل الاصاله*
*مخلف عون من دنياه جارت*
*عليه وكدرت بالحال باله*
*باذن علام مايخفى علينا*
*تحل اللي تعقد من حباله*
*وعلى الجيران وضيوف وقرابه*
*مثل وبل الحيا لاقبل خياله*
*لهم بارض الحجاز ونجد هيبه*
*قبل مايسودها حكم وعداله*
*عطيت المستمع موجز ونبذه*
*مثل ماقيل عنوان الرساله*
*قليل الهرج يكفي عن كثيره*
*على المنبر ماودي بالاطاله*