واجرحي الدامي على منقع الجود= سيفي ونبراسي وقوة رصيدي
من العام والخافي من لهود بلهود =اذا التم جرحه زاد جرح جديدي
خلال عشر شهور من سود في سود =الجرح ينزف حمر جيج وصديدي
ينزف على محمدوينزف على سعود= وينزف على فضل بن فضل الوسيدي
على اصدقأي اللي بهم ينطح الكود= دين ووفاومنطق واري سديدي
وعقل وثقل وحبوس وحصون وسدود =ونواظر ترفع نظرها بعيدي
وعزوم قوة باسها ماله حدود= يلين من باس الثلاث الحديدي
وحبل الوفا مبرم ومثني ومشدود =اذا استهان بمقتضاه البليدي
ماهم رفقا جدات وسهود ومهود =رواسي الرفقة جمال المديدي
حاضر على ماضي مواريث وجدود =منهم متابع نهجهم يستفيدي
مهما يكون الحي بالموت ماعود= مومن ولكن حر فقد الفقيدي
من العام تركيزي وهوشبه مفقود =أحــس بعض أحيان كني وحيدي
لو شفتني ماجود ماني بموجود =ولو قلت لك سعيد ماني سعيدي
ماني بلاخايف ولاني مضهود =لكن حزن فراق ربعي يزيدي
اجسامهم يسرح ويمرح بها الدود =وانا بهم ذكراي تنجب قصيدي
عابد وانادي همس بالليل معبود= يلطف بهم في حره شديدي
ماقدر المعبود ماهو بمردود= ويش يقدرون يقدمون العبدي
الاالدعاء ركاع وبروك وسجود =ورفع التضرع للعزيز المجيدي
يغفر لهم في يوم شاهد ومشهود =يوم المحاسب والوعد والوعيدي
يافارج الكربات يامسير النود= تجبر عزا من حــــس فقد العضيدي