يا الله يا غافـر خطـا كـل مـن تـاب=يا مـن علـى عرشـه يناجـي خليلـه
يا الواحد اللي مـن ترجـاه مـا خـاب=يا صاحب الأسمـاء والصفـات الجليلـه
يـا وامـر الهـادي بتقريـق الأحـزاب=يـا منـزل المـا مـن بخـار المخيـلـه
يا اللي خلقت آدم من الـروح وتـراب=يـا مرسـي الأوتـاد فـوق الثقيـلـه
تغفـر لْعبـدٍ مـن خطايـاه منـصـاب=كيـف يتخـارج باللقـى مـن عميلـه
ما هو لقى بسيـوف وارمـاح واحـراب=احسـاب والمكتـوب صعـب تعديلـه
مابـه وساطـه لا معـارف ولا اقـراب=كـل لحالـه والمحاسـب يـجـي لــه
دام الحيـاه العبـد مـا يحـس بعقـاب=ولا يحـط فـي دنيـاه لآخـر رحيـلـه
وطبـع الحيـاه النـاس مـل بهـنـداب=وكـل بذاتـه لـه اسلـوب ووسيلـه
احـد اسلوبـه يوصلـه راس مرقـاب=واحـد قصـر مـن دون راس الطويلـه
ولا كامـل إلا المعتلـي رب الأربــاب=والنـاس كـل فيـه عـدلـه وميـلـه
الخيـر لـه ساعـي وللـنـار شـبـاب=وكـل علـى مسعـاه يلقـى حصيلـه
للشعـر نـقـاد وللعـلـم كـتـاب=والنـاس كـل سايـر فــي سبيـلـه
والعلم نـور وجاهـل العلـم مرتـاب=والجهـل ليـل وقلـة العـلـم ليـلـه
ليل طويـل وفيـه نـور القمـر غـاب=مظلـم وسـاري ليلـتـه مستطيـلـه
والعلـم بـاب وداخلـه عـدة أبـواب=وعلم الأدب والديـن سـاس الفضيلـه
ويا أهل الأد ب بيت الأدب حف الأنساب=لمـن جـاد سـاس بنـاه واثبـت ليلـه
واعرب عن الماضـي واثبـت بالاعـراب=والسيـل قصـه مـن عوالـي مسيـلـه
وقاده وساقـه واثبـت البيـت باطنـاب=على عمد مـن صلـب باصـل القبيلـه
واثبت خبر ماضي المـن هـو باصـلاب=بيت حجـر علـى صخـر مبتنـي لـه
ولا مات من أخر من القـول مـا طـاب=يقـراه جيـل يـا رثـه عقـب جيلـه
دام الشريعـة بالبلـد ظـل واحجـاب=فـي ظـل حكـم مـا نـدور بديـلـه
ما فيه لا احـزاب ولا موجـة ارهـاب=واهل النفـوس الكـوس تبقـى ذليلـه
الا ان بالغفـلات صلـب العـرب ذاب=والزنـد يمـكـن يعـتـرف بالفتيـلـه
ومن لا انتبه مالـه عـن ذيـاب مجنـاب=وشلفـا ذيـاب مصممـة للكحيـلـه
وعلـق بهـا غاسـق وثبـت بهـا نـاب=واشتالتـه بيـن الضـلـوع الأصيـلـه
والحبل في وقـت الرخـى صايـر داب=يـقـرص بمثنـاتـه وراسـه وذيـلـه
والبـل جنبهـا يفكهـا شـر الأجنـاب=ويحضـر الجانـي لخصـمـه كفيـلـه
ولا كل من يرمي الهدف للهدف صـاب=ياللـي تمنـى ظـل دوحــة ظليـلـه
تبي الشباب وراس أبو زيـد قـد شـاب=ومـا فـات مـات وعودتـه مستحيلـه
يبقى الغـراب غـراب والحـر حطـاب=متفاختيـن وكــل نــوع ومثيـلـه
والسيف له حديـن واذبـاب وانصـاب=واليـا عطـى المعطـي يعيـي وكيـلـه
والماص له مفـراص واللـوح مشـذاب=والعنـق يقطـع بالسيـوف الصقيـلـه
ليامن شيـخ القـوم عـن ماقفـه هـاب=ادر انهـا راحــت عليـهـم سحيـلـه
واليا استدل الـراس فـي راي الأذنـاب=غيـم سـمـاه وعـرضـوه الفشيـلـه
وان صـار مـا للحـق بالـوم طـلاب=تبقـى الفريضـة عنـدهـم كالنفيـلـه
من الخطايـا بالرجـل تـرك الأسبـاب=واغـذاه دم قـراه بــاردا فصيـلـه
ومن لا حسب للمقبلـه ميـة حسـاب=النـفـس تـامـر سيـدهـا بالرذيـلـه
البيـر لـه حفـار والدلـو جــذاب=والوقـت ثابـت مـا تغيـر موديـلـه
اللي تغيـر مـن لبـس جلـد سنجـاب=غـيـر تقالـيـده وقـلـد زمـيـلـه
واللي ليـا منـه وصـل حـزم كـلاب=مـن ردنـه الميـاح عـمـر سبيـلـه
فهـار بالبـتـار عكـفـان الأشـنـاب=تهـاب عكفـان الـشـوارب مقيـلـه
راعي هـلا بالاجنبـي مثـل الأصحـاب=بنفـس علـى الميسـور ماهـي بخيـلـه
تحت اسمر مبنـي علـى سبعـة أقطـاب=ونجـره يـنـادي للنشـامـى عويـلـه
اليـوم ينظـر لـه تقـل وسـط دولاب=يـكـن عبـراتـه ويكـتـم غليـلـه
حلّ بمحلّـه مـن احديّـه الـى اغـراب=علـى الجمـيـل يـشـاورن الحليـلـه
نـاس مجالسـهـا نميـمـة ومغـتـاب=وإلا أربعـة وكــل يشـتـم قبيـلـه
قـوم تحيتـهـا مـلاعـن وكــذاب=متبادلـيـن السـاذجـات الهـزيـلـه
ولا اعم كـل النـاس والكثـر غـلاب=والسالمـيـن الـيـوم نــاس قليـلـه
والناس مثـل الأرض وديـان وهضـاب=يافهمـيـن مـقـصـدي وتحلـيـلـه