أبد يت ما في خـاطري بالتمـاثيـل= شي شــغل فـكري وقـررت أقوله
أشياءتبي درس ودراسه وتحـليل = لوكان يمكن فهــمها بسهوله
ماهوبحب لكثرة القول والقيـــل = لكنها أشياء غايبه ومعزوله
يختص فيها نافلين الريجيل = امر ماكل اللي يريده ينوله
انا ادري ان ايامنا بذت الحيل = فيها وفيها مايله ومعدوله
لياتعدل جيل صاب المرض جيل = لين افسدوها مدعين البطوله
العدل فيهاقّلّ واستفحل الميل = حتى الزمان يغيرون بفصوله
وانا نويت ادلي بدلوي ولااعيل = وآخذ مع اهل الراي والعرف جوله
مرزوق اعرفه وافي يوفي الكيل= ما غاب عن غيره بفكره يطوله
حكيم متحكم ومدرك وحلحيل = وان قال قول نوّر الفكر قوله
يابن مبشر هات رايك بتفصيل = بامريخص الشعر ويدور حوله
الشعر ضاع وضيعوه المهازيل = جنازة في كل عود محمــوله
ومصيبته من كثر الحط والشيل = كل بلا تمييز يشعب ذلوله
احد من اجل الحب مايرقد الليل = يقول حبّه من زمان الطفوله
يبغى الثريا شايف نفسه اسهيل = متصنّع جور الزمان بذهوله
يشكي من الدنيا ويبكي من الويل= ومعناه من بعض المعاني عدوله
واحد ذليل وزاده الشعرتذليل = ياخذعلى طمس الحقايق عموله
راع الحمار يصوره فارس الخيل= الكذب رغم انه يعرفه يقوله
مسافة البوصه على رغبته ميل = ويسمي الناس الذليله خجوله
ويقول هذا ليث لوهوولد فيل = مع الطمع ينسى معان الرجوله
عين على دجله وعين على النيل =ولا فيهن اللي في نفاقه ينوله
لا قال حق ولا حصل له محاصيل= ورا القراده بايدات نعوله
شكله رجل لكن بقوله طلع ذيل =كيف الرجل يرضى نفاقه يعوله
في منطقه يعجبك حجّه وتاويل =ويعجبك في شكله وعرضه وطوله
ليا تكلم تحسبه ينطح السيل = لكن علومه ماتوافق فعوله
وناس تبي تدخل على الشعرتعديل=ومنصبين ارواحهم من فحوله
هم مفلسين وكل يميل ويعيل =يشره على مطالب ماهي حوله
والشعر ذمّه يالرجال المشاكيل = اللي يشك بصحته لايقوله
ميزان حق ولايجي فيه تضليل = به تفتخر دوله وتنهان دوله
به ترسم اخطوط السنين المقابيل= ويشرح تراث باليات اسموله
وبه تنشر احداث الملا باالتفاصيل=ليا صاغه اللي فاهم في وصوله
الشعر لاسلعه ولاهو بتمثيل =ليا فقد معناه يصعب قبوله
ماهووسيله لاحتيال ومحابيل = لوان جهال الملا صفقواله
قلته وانا مالي على الناس تخويل =ولا اجامل اللي مايلات حموله
وعداد ما هلت مزون المخاييل =صلاة رب البيت على رسوله

ــــــــــــــــــــــــــــــــــــــــ

حي الرساله والخبر والمراسيل =من شاعر له كل جزله نحوله
فرايده ماهي تصنّع وتبجيل = بالعقل يصخر كل وضحا معقوله
يصخرجلايل مايصخّر مخاليل = له بالجزال اجزال صوله وجوله
يسوقها بالمطيبه والفناجيل =ومعها من دهن ازرق العود توله
يسقي هدف معنى القصيدة شهاليل = من منهل بعض العرب ماوردوا له
بتدوال أشعاره تطيب التعاليل = شعره اذا قيل الرجال اصنتوا له
كنه يجيب المفردات بقناديل = بتجاربه ماقال عن ماوصفوا له
مايجيبها ملفوفة بالزهاميل = واضح بمطلاعه وواضح نزوله
يشيد ثم يزيل ويشيل ويزيل = واذا أعلنه أهل الرجاح شهدوا له
على الهدف يرمي حجر طير أبابيل = ماعاد باقي قول عقبه نقوله
حمس ودق وطاب كيف المعاميل = وأكرم بفعل وقول من سيروا له
على هلا والعلم يحتاج تحليل = الوضع ماهو ياعلي بالسهوله
ياعلي تطلب راي يشرح بتفصيل = معنى هدف شمط اللحى قد غزوا له
الراي ترك الهامله والمثاميل = انت بزمن فيه العيوف مغيوله
ياعلي خلف الجيش خيل وزماميل = والمعترض لأفكارهم ماحسبوا له
ياعلي خل الريل لاتعارض الريل = لاتعترض له قوته في رجوله
ماأنت مكلف في ذراري إسماعيل = مالك ومال الناس يابن الحموله
آمين يعبون القصيد ببراميل = الشعر ماانته يابوخالد رسوله
لكن قل لأهل الجمال الجماميل = خل القوافل سايره محموله
وبعض القصيد اليوم مثل المناديل = معناها ريغاء والبيوت معفوله
وبعض الآوادم لو قصيده طهابيل = تصير عوجه يابن زيد معدوله
مايهمهم ياتي صفوف وجواديل = عين الرضا تطسم فدايح خلوله
وشعر ببعض الصحف جديد ومحيل = غرام روس بالوضيع مغسوله
شعر الحداثه والملالا ومواويل = وشعر يادان دان دقت طبوله
سيل بليل ودبك خيل وخلاخيل = وناس وقفوا ضده وناس بركوا له
واللي يصبون المعاني هماليل = على الصباخ لكسب بعض السيوله
يمدح رياء ويرتل المدح ترتيل = ويطبخ لحم حرجه على نار كوله
والغيل مارد للكبود المغاليل = اللي اذا شافوا نضيح أدبكوا له
الناس كل له ميول ومداهيل = وكل بعقله مقتنع في ميوله
وإن كنت ضد أهداف بعض المواصيل = لاتنشغل في صاحيه ومهبوله
للأذن سماعه وللعين دربيل = والعقل يضع كل شي بوصوله
كل بماله حر لكن غرابيل = الناس بأية باب حق دخلوا له
إن قال وإلا أعطى سبايك سماليل = زعل رضي يرتاح يطق جوله
باللي مجنب عنك مالك مداخيل = اطلب من اخير العباد سجدوا له
يسترك بالدنيا من القال والقيل = بعض اقتلوا ذكرك وبعض شفعوا له

_____________________________________