سميت بأسم اللي بدا الكاف والنون = ما بين كاف ونون والعلم تمه
الخير اللي له عباده يصلون = اللي شمل فضله على كل الأمه
مادام عبده حي والرزق مضمون = متكفلٍ به حين بالرحم ضمه
هو ما ينام وكل خلقه ينامون = وأرحم من الوالد لطفلٍ يزمه
البارحة جتني هواجيس وشطون = النوم لا يمي ولاني بيمه
هاجوس ما ودي به الناس يدرون = لو ما قرب درب الردى والمذمه
والعين كن بوسطها شب وفنون = صقطات لقطاتٍ على الكبد سمه
يا فاعل المعروف بالنذل مغبون = يمكن يجي مع الضعف ضعف ذمه
الطيب بالنذال يغسل بصابون = خسران كنه جادعه بالمقمّه
من ينكر المعروف والطيب ملعون = لا تامنه لو شفت فوقه معمّه
والظن ما عرضه مع الناس مصيون = إليا طرى طاريه كلٍ يزمه
اسلاف واتلافٍ على غير قانون = ضاعت عساه يضيع بالقار دمه
حتى يتذكر جور الأيام وشلون = ويعرف عقب الجور خاله وعمّه
يا ناصرٍ موسى على جند فرعون = تقبل دعاء اللي ضربته مستشمّه
عزاه يا صدرٍ من الهم مشحون = أجاحد همومٍ بصدري تخمّه
ضاعت هجوسي بين صاحي ومجنون = أحدٍ يحفر البير وأحدٍ يدمّه
تميت خمس سنين صابر على الهون = مع مومسنٍ كني غريقنٍ بجمه
والله ومر رجلٍ به الجود مضمون = عبدالعزيز حمود بألاسم سمه
وابديت لـ أبن حمود ما كان مكنون = والخير واجد مار أنا كيف ألمه
والله يا لولا الله فزع لي بـ أبالعون = لا غاص بي ناب الدهر رحت يمه
لا قلت يا أبن حمود يقول ممنون = لا صار ياجد لا زمي ما يهمه
يفداه عفنٍ لو ملك مال قارون = ما يكسب الحسنى ولا بـ أبن عمه
والا أبو خالد له رجالٍ يقرون = تنشر له البيضاء على راس قمة
الله يفرج له من الكرب والهون = اللي فرج كرب الزغيبي وهمه
في جاه من خلقه ببيته يلبون = يرحم أبوه حمود ويعافي أمه
إلا ومع ذالك ستيرٍ ومأمون = ما يعمي عيونك بلفحات كمه
أنا غني ما ودي الناس يدرون = يضحك عليّ اللي ديونه مطمّه