يا طير سلم لي ليا جيت أبالعون = يعرف محله بينٍ بالقصيمي
في مجلسه عصم الشوارب يرودون = فعلٍ تبنى منهجه من قديمي
بلغ تحياتي وأنا منك ممنون = عسى مطيرك بالجناح السليمي
إعداد ما لبوا حجيجٍ يطوفون = وحرك غصون الراك هب النسيمي
وأحلى من الصافي عن اللمس مصيون = سلسال نحلٍ بالخلايا نجيمي
يرضون وإلا على غير يرضون = له عندنا منزال قدرٍ حشيمي
مير اقهرن يا سبق الحصن بالهون = نزله على عذب المشارب مقيمي
اللي مواقيفه لها الناس يدرون = يوم استخال خيال سحبٍ وديمي
ما قال يا فزع المناعير تكفون = باسه على دوس المعارك غريمي
عقب الرجال اللي على الفعل يافون = أسلافهم لا خلافهم بتعليمي
دفانة الركبة ضحى جضة الكون = عاده يمنّى ضدهم بالهزيمي
عقب اللقاء بمرهفة كل مسنون = يا ما تقسم بينهم من وسيمي
واليوم أمان وخادم إبليس ملعون = على الشريعة حكمنا مستقيمي
حكم السعود اللي على الحق يمشون = في عهدهم ما ساد حزن اليتيمي
عطيت نبذه والعوارف يعرفون = ما يلتبس بأسلوب صنعه غشيمي
غرايبٍ من دولب الفكر مازون = ولاني على الدنيا الوحيد الفهيمي
أقول وأهل الصنف مثلي يقولون = كم شاعرٍ بأسلوب شعره حكيمي