سريت بأفكاري على حلم مشحون = بالعاطفه فكري سرى في سبيله
ساعة سمعت أشعار عذبات ولحون = من شاعرٍ بالشعر يندر مثيله
مثايلٍ فيها تعابير وفنون = وسحر البيان من المعان الجميله
نظم الحكيم اللي نظمها بقانون = بجزل البيوت اللي وفاها بكيله
نظمٍ كما عقد الدرر فوق مزيون = بعنق الهنوف أم الرموش الظليله
من قول أبو خالد فتى الجود أبالعون = مثايلٍ والصدق فيها دليله
ونويت أعبر له وأنا منه ممنون = وأرفع له التقدير بأية وسيله
أما اتصل به واشكره بالتلفون = أو اصله باللي جديدٍ مديله
وأعطيه تعبيرٍ على قاف موزون = لو بان نقصه ما معي فيه حيله
جهدي وأنا بالشعر والناس يدرون = مواهبي في غوص بحره قليلهه
وكتبت من قلبٍ به الهم مشطون = مما جرى شال الحمول الثقيله
يوم انبرا بالهذر ناسٍ يشطون = تنابحوا مثل الكلاب الهميله
على القبيلة بالقصايد يقولون = بالهرج كلٍ قام ينفض خصيله
ومقدارنا عنهم محشم ومصيون = والهرج فينا ما ينقد مقيله
لاشك زاد وفيه قاموا يعيلون = وحنا نجازي كل عايل بعيله
وربعي على رد البرا ما يكلون = واللي بدا نجزاه والله وكيله
نردع بصدق القول جمله ومشمون = بذكر الحقايق بالبيوت الجزيله
وهم على غط الثنا حيل يمشون = بالكذب ينفون الفعول الجليله
لين إن أبو خالد ربط كل مجنون = وطى جلود الجرب وأوقف قبيله
وأهوى كما حرٍ على الصيد مفتون = شاف الحباري في فياض خميله
ضربه عطب مابه تشاكيك وظنون = ذباح ما طالع بضربٍ يزيله
رج الهدف في مدفعٍ يرهج الكون = وصاروخ عابر للخطوط الطويله
ومدمره للخصم شرٍ وطاعون = لين انها راحت عليهم سحيله
وقذايفٍ في رميها الموت مرهون = خلت خصومه تنخضع له ذليله
وعقب الهدير اقفوا عن الدرب يرغون = متحملينٍ للخزى والفشيله
مشكور يا من ما رضى موقف الهون = وسخر لسانه سيف دون القبيله
سيفٍ على اللي شايلٍ حقد مكنون = غلٍ قديم وسط قلبه يشيله
على قبيلة حرب حاقد ومغبون = وبالهرج عن ما فات يبرد غليله
يحط له بالكذب وقفات وركون = يوم إنها في وقتها مستحيله
ينسى خيالٍ به موارات وشجون = هروج ناقصة العقول الهبيله
يرجي ومن حوله برجوه يرجون = طمس الحفايق بالهروج الطويله
والفعل ما يمحاه هراجة الدون = لو ظل يحكي في نهاره وليله
أفعالنا سفرٍ مخلد ومصيون = سفرٍ سطرنا فيه تاريخ جيله
ملامحمٍ فيها العرب دوم يوحون = ومواقفٍ عند الملاقى مهيله
فيها نسطر علم ثابت ومضمون = وأقلامنا حدب السيوف الصقيله
نكتب بها يوم اللقاء بأحمر اللون = وأوراقها مسكان من ننتوي له
والحرف قبر الضد بالخد مدفون = وقبور الأعداء للكتابة وسيله
يوم إن حرب تشن كونٍ بأثر كون = والضد تاطى في حماه وتشيله
على سروج الخيل ساعة يغيرون = مركاضهم سحم الذياب تعني له
يردون حوض الموت له ما يهابون = على المهار السابقة والاصيله
كم شيخ قومٍ قدمهم طاح مطعون = من عقب قو الباس حدر النثيله
عونا لو له دفاعات وحصون = من خوفنا تسهر عيونه بليله
افعال شاهدها بها دوم مقرون = ما هي سواليف النفوس العليله
يشهد بها التاريخ والناس يقرون = غصبٍ على اللي الحق قيله
يوم الجزيرة دون شرعٍ وقانون = لنا بها عبر السنين الطويله
واليوم أمان وراعي الشر مسجون = بالشرع والمظلوم حقه يجي له
بحكم السعود اللي على الضد يسطون = للشعب ريف وللعدا حنظليله
حكامنا اللي بالشريعة يحكمون = حكم العدالة ما ندور بدبله
وتم الجواب ومثلكم لي يعذرون = واللي قصر جودك يكمل حصيله
واقبل سلامي يا حمى كل مشطون = بأخر كلامي يا مزبن دخيله
وصلاة ربي عد ما دار بالكون = من النجوم وعد وبل المخيله
على النبي ما غرد الطير بلحون = وما ورد من جول القطا للثميله